Statistik maʼlumotlarga ko‘ra, dunyo iqtisodiyoti har yili korrupsiyadan 2,6 trillion AQSh dollari miqdorida zarar ko‘rmoqda. Korrupsiya, bu – mansab mavqeidan shaxsiy maqsadlarda foydalanish bilan bog‘liq bo‘lgan jinoyat bo‘lib, jamiyatni yemiradigan illatdir.

Haqiqatda, korrupsiya islohotlar yo‘lidagi eng katta to‘siq va g‘ov hisoblanadi. Shu bois, so‘nggi yillarda bu illatga qarshi kurashish bo‘yicha qonunlar qabul qilinib, yangi tizim yaratildi. Parlament palatalarida masʼul qo‘mitalar, Korrupsiyaga qarshi kurashish milliy kengashi va agentlik tashkil qilindi. Eng muhimi, jamiyatda korrupsiya muammosini jamoatchilik muhokamasiga olib chiqadigan ochiq tizim va muhit yaratildi.

“Navoiy kon-metallurgiya kombinati” aksiyadorlik jamiyatida bu borada kelib chiqishi mumkin bo‘lgan holatlar chuqur o‘rganilib, ularni bartaraf etish choralari rahbariyat darajasida hamda joyiga chiqqan holda muhokama qilinmoqda. Bu jarayonlar ustidan qatʼiy nazorat o‘rnatilib, tahliliy va amaliy ishlar tizimli ravishda olib borilmoqda.

Prezidentimiz Shavkat Mirziyoyev Oliy Majlis va O‘zbekiston xalqiga yo‘llagan Murojaatnomasida korrupsiyani davlat taraqqiyotiga jiddiy tahdid deya baholab, 2026-yilni bu illatga qarshi “favqulodda holat”, deb eʼlon qildi. Korrupsiya – davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid ekanligini uqtirdi.

Murojaatnomada olg‘a surilgan vazifalardan kelib chiqib, kombinat Komplayens xizmati ham kelgusida amalga oshirilishi zarur bo‘lgan rejalarini belgilab oldi.

Birgina, o‘tgan yilgi ishlarni tahlil va sarhisob etadigan bo‘lsak, 120 ta hujjat va fuqaro qabuli bo‘yicha rasmiylashtirilgan 38 ta bayonnoma, shuningdek, 8 mingdan ziyod ichki idoraviy hujjatlar huquqiy va korrupsiyaviy ekspertizadan o‘tkazildi va qonuniyligi taʼminlandi. Korrupsiyaviy ekspertiza natijasida 168 ta ichki idoraviy hujjatlar loyihalari normativ-huquqiy va ichki idoraviy hujjatlar talablariga muvofiqlashtirildi. Ishchi-xodimlar o‘rtasida 146 marotaba huquqiy targ‘ibot va profilaktik tadbirlar o‘tkazildi. Tadbirlarda qariyb 11 mingga yaqin ishchi-xodim qamrab olindi.

Ishga qabul qilish va boshqa ishga o‘tkazish bo‘yicha komissiyaning 763 ta, homiylik va xayriya yordamlarini ko‘rsatish komissiyasining 81 ta yig‘ilishlarida komissiya aʼzosi sifatida ishtirok etildi. Jamiyatda faoliyat yuritayotgan 5,5 ming nafarga yaqin boshqaruv xodimlariga yillik ehtimoliy manfaatlar to‘qnashuvi to‘g‘risidagi deklaratsiya to‘ldirtirildi. Dastlabki tahlillar natijasida 22 ta mavjud va 73 ta ehtimoliy manfaatlar to‘qnashuvi holatlari aniqlandi hamda ularni bartaraf etish bo‘yicha Odobaxloq komissiyalari tomonidan tegishli tartibda qarorlar qabul qilindi. Ijobiy natijalar bilan yakunlangan 2025-yil misolida yana ko‘plab aniq raqamlar, dalillarni keltirish mumkin.

Muxtasar aytganda, korrupsiya – taraqqiyot kushandasi, xavfsizlikka tahdid tug‘diruvchi xavfli jinoyatdir. Bu illatga qarshi kurashish tegishli organlarninggina emas, barchaning ishi bo‘lishi zarur. Shuning uchun ham ulkan korxonamizda bundan keyin ham korrupsyaga qarshi taʼsirchan choralarni kuchaytirish bizning birinchi darajali vazifamiz bo‘lib qoladi.

Rustam AVEZOV,

“NKMK” AJ Komplayens xizmati boshlig‘i.