“Navoiy kon-metallurgiya kombinati” AJda mahalliylashtirilgan, import o‘rnini bosuvchi mahsulotlar ishlab chiqarish hamda tarmoqlararo sanoat kooperatsiya aloqalarini rivojlantirishga alohida eʼtibor qaratilmoqda.

Taʼkidlash kerakki, bir necha yil oldin kombinat tashabbusi bilan import o‘rnini bosuvchi mahsulotlarni o‘zlashtirish bo‘yicha mahalliy tadbirkorlik subyektlari bilan texnologik hamkorlik, yaʼni, “shatakka olish” mexanizmi joriy etilgan edi.

Bugungi kunda muvaffaqiyatli qo‘llanilayotgan ushbu mexanizm doirasida mahalliy korxonalarda ularga konstruktorlik va texnologik hujjatlarni ishlab chiqish va taqdim etish, mahsulotlar sifatini talab darajasigacha yetkazishda texnik maslahat va amaliy ko‘mak berish orqali kombinat ehtiyojlari uchun yangi turdagi mahalliylashtirilgan, import o‘rnini bosuvchi mahsulotlar ishlab chiqarilmoqda.

- 2021-2025-yillarda Navoiy kon-metallurgiya kombinati tomonidan ko‘plab mahalliy korxonalarni shatakka olish natijasida yangi turdagi mahsulotlar o‘zlashtirilib, kombinat ehtiyojlari uchun 2,9 trln. so‘mlik sanoat mahsulotlari xarid qilindi. Hozirgi vaqtda kombinat tajribasi bo‘lgan “shatakka olish” mexanizmini qo‘llash natijasida respublikamizning turli hududlarida faoliyat olib borayotgan bir nechta korxonalar bilan sanoat kooperatsiya aloqalari o‘rnatilib, ularning faoliyati kengaydi va ishlab chiqarish hajmi bir necha o‘n baravarga oshdi, - deydi “NKMK” AJ Mahalliylashtirish dasturlarini shakllantirish va monitoring qilish bo‘limi boshlig‘i Ulug‘bek Sanaqulov.

Xususan, “Gidrostankoservis”, “Navpromlitmash”, “Chilon Lubrikants”, “Navoiy elektrod zavodi”, “Navoiyelektroremont”, “Yevropromlider”, “Karbon-Polimer”, “Metall mahsulot zavodi” MChJ kabi mahalliy korxonalarda tayyorlangan yuqori sifatli filtrlar, po‘lat qotishmalar, texnik moylar, turli xil reagentlar, grafitlangan elektrod, turli qulaylikka ega elektrodvigatellar, zamonaviy uskunalar, yuqori darajada filtrlovchi matolar, ftoroplast, polimer, metiz mahsulotlari xarid qilinmoqda. Masalan, Navoiy shahrida joylashgan “Gidrostankoservis” MChJ o‘tgan yili kombinatga 469 tonna mahsulot yetkazib berdi. Mazkur korxona 2007-yil tashkil etilgan bo‘lib, kon-shaxta jihozlari va ehtiyot qismlari, burg‘ilash, yuk ko‘tarish hamda mashinasozlik mexanizmlari ishlab chiqarishga ixtisoslashgan.

2030-yilga qadar “shatakka olish” mexanizmi doirasida sanoat kooperatsiyasi aloqalarini yana-da kengaytirish bo‘yicha ishlar davom ettiriladi va hamkor mahalliy korxonalar soni 50 taga yetkaziladi. Kombinatning bu kabi saʼy-harakatlari tadbirkorlik subyektlari uchun qo‘shimcha imkoniyatlar yaratishda muhim ahamiyat kasb etmoqda.

“NKMK” AJ Matbuot xizmati