Navoiy mashinasozlik zavodi – Navoiy kon-metallurgiya kombinatining mahalliylashtirilgan va import o‘rnini bosuvchi mahsulotlarni ishlab chiqaradigan yirik bo‘linmasidir.

Bugungi kunda zavod tarkibiga 11 ta sex, 5 ta uchastka, 3 ta laboratoriya hamda Taxiatosh metallkonstruksiyalar va nostandart jihozlar ishlab chiqarish zavodi, Termiz va Nurobod mexanika zavodlari kabi bo‘linmalar kiradi. 3,4 ming nafar ishchi-xodim ishlab kelayotgan korxonada ishlab chiqarilayotgan mahsulotlar nomenklaturasi 15 ming turdan ortiqni tashkil etadi.

Hozirda zavodda tayyorlanayotgan mahsulotlarning 98 foizi kombinat ehtiyojiga yo‘naltirilmoqda. Navoiy mashinasozlik zavodi faoliyatida eʼtirofga molik yutuqlardan biri bu korxonada kombinat gidrometallurgiya zavodlarida ishlatiladigan yirik hajmdagi tegirmonlar ishlab chiqarilishi yo‘lga qo‘yilganligidir. Xususan, Mahalliylashtirish dasturi doirasi o‘tgan yilda zavodda 11 ta turli o‘lchamdagi maydalash tegirmoni tayyorlanib, kombinat bo‘linmalariga yetkazib berildi.

So‘nggi yillarda zavodning mexanika-yig‘uv sexini texnik va texnologik qayta jihozlash hamda qo‘ymachilik sexi quvvatini oshirish bo‘yicha investitsiya loyihalari amalga oshirildi. Natijada, mexanika-yig‘uv sexida og‘irligi 980 tonnagacha bo‘lgan tegirmonlar, og‘irligi 400 tonnagacha bo‘lgan yirik o‘lchamdagi jihozlarga ishlov berish imkoni mavjud bo‘lib, qo‘ymachilik sexida o‘rnatilgan yangi pech metall eritish quvvatini 10 ming tonnaga oshirdi.

2025-yilda zavodda 103 loyiha bo‘yicha umumiy qiymati 1 trln. so‘mdan ortiq bo‘lgan mahalliylashtirilgan va import o‘rnini bosuvchi mahsulotlar, shu jumladan, yangi turdagi metall kesish dastgohlari, turli rusumli maydalash tegirmonlari, ekskavatorlar uchun reduktor va kovshlar, gidrometallurgiya zavodlari uchun nostrandart uskunalar va ehtiyot qismlar ishlab chiqarildi.

Navoiy kon-metallurgiya kombinatida amalga oshirilayotgan investitsiya loyihalari hisobiga kombinat bo‘linmalarining texnologik va kon uskunalari uchun ehtiyot qismlarga bo‘lgan talabining ortishi tufayli mahalliylashtirilgan mahsulotlar ishlab chiqarish hajmi yanada ortmoqda. Bu, kelusida nafaqat ish ko‘lamini oshirish, balki yangi ish o‘rinlarini yaratishga xizmat qiladi.

“NKMK” AJ Matbuot xizmati