“Navoiy kon-metallurgiya kombinati” AJda mahalliylashtirilgan va import o‘rnini bosuvchi mahsulotlarni ishlab chiqarish bo‘yicha olib borilayotgan ishlar ko‘lami yildan-yilga kengayib bormoqda.

Xususan, kombinat tomonidan so‘nggi besh yilda jami 3,1 trln. so‘mlik mahalliylashtirilgan mahsulotlar o‘zlashtirilib, ishlab chiqarish hajmi 2,7 barobarga oshdi. Joriy yilda mahalliylashtirilgan mahsulotlar ishlab chiqarish hajmini 1,4 trln. so‘mga yetkazish rejalashtirilgan. Shu yilning 1-yarim yilligida Mahalliylashtirish dasturi doirasida 172 ta loyiha bo‘yicha 757,5 mlrd. so‘mlik mahalliylashtirilgan mahsulot ishlab chiqarildi. Loyihalar orasida yirik o‘lchamli maʼdanlarni maydalash tegirmonlarini ishlab chiqarish eng katta vazifalardan biri hisoblanadi.

Mazkur dasturini amalga oshirishda kombinatning har bir bo‘linmasi munosib hissasini qo‘shmoqda. Jumladan, mahalliylashtirilgan mahsulotlarni ishlab chiqarishda Navoiy mashinasozlik zavodi kombinatning yetakchi korxonasi hisoblanadi. Bunda, nafaqat asosiy faoliyat uchun ehtiyojdagi mahsulotlar, balki kombinatda olib borilayotgan investitsion loyihalar uchun nostandart, texnologik jihatdan murakkab uskunalar ishlab chiqarilmoqda. Jumladan, “7-gidrometallurgiya zavodi ishlab chiqarish quvvatlarini kengaytirish” investitsion loyiha doirasida kombinat mutaxassislari tomonidan 5,5x8,5 metr va 7,0x2,3 metr o‘lchamli to‘liq jihozlangan maydalash tegirmonlari tayyorlandi.

Bir so‘z bilan aytganda, kombinatda mahalliylashtirish darajasi bugungi kunda 60 foizdan yuqori. Mavjud xomashyo, ishlab chiqarish, ilmiy-texnik va mehnat unumdorligini tahlil qilish asosida yangi loyihalarni tatbiq etish hamda amaldagi loyihalarni davom ettirgan holda, asosiy eʼtibor mahalliylashtirish dasturini keng joriy etishga qaratilgan.

“NKMK” AJ Matbuot xizmati