Bugun, erta tongdan mamlakatimizning taʼlim muassasalarida yangi o‘quv yili boshlanib, maktablar yana o‘quvchilarni o‘z bag‘riga oldi.

Xususan, 2,5 ming nafardan ortiq o‘quvchi tahsil olayotgan Navoiy shahridagi 4-umumtaʼlim maktabida ham O‘zbekiston Respublikasi davlat mustaqilligining 34 yilligi va Bilimlar kuni munosabati bilan bayram tadbiri o‘tkazildi. Tadbirda “Navoiy kon-metallurgiya kombinati” AJ Boshqaruvi raisi – Bosh direktori, senator Q.Sanaqulov ishtirok etib, maktab pedagogik jamoasi hamda o‘quvchi-yoshlarni mamlakatimiz mustaqilligining 34 yilligi va yangi o‘quv yili boshlanganligi bilan tabrikladi.

Tadbirda taʼkidlaganidek, Yangi O‘zbekistonda davlatimiz rahbari Shavkat Mirziyoyev tomonidan taʼlim sohasi chuqur isloh qilinib, mamlakatimizda yangi maktablarni barpo etish va kengaytirish, kelajak avlod vakillarining puxta bilim egallashi uchun barcha sharoitlar yaratish bo‘yicha keng ko‘lamli ishlar olib borilmoqda.

4-umumtaʼlim maktabi o‘quvchilari fan olimpiadalari, turli tanlovlar, sport musobaqalari, oliy o‘quv yurtlarga kirish bo‘yicha salmoqli yutuqlarga erishmoqda. Jumladan, ushbu taʼlim dargohini o‘tgan o‘quv yilida tugatgan 125 nafar bitiruvchidan 120 nafari o‘qishga kirgani quvonchli natija, ustozlar mehnati mahsulidir.

Yangi 2025-2026-o‘quv yilida 350 nafar o‘g‘il-qiz 1-sinfga qabul qilinib, ularga Prezidentimiz sovg‘alari topshirildi.

Birinchi qo‘ng‘iroq sadosi o‘quvchilarni yangi o‘quv yiliga chorladi.

“NKMK” AJ Matbuot xizmati