“Navoiy kon-metallurgiya kombinati” AJda inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash muhim ahamiyat kasb etadi.

Kombinatda mehnatni muhofaza qilish birinchi darajali vazifa hisoblanadi. Bu bo‘yicha ishlar milliy va xalqaro standartlarga qatʼiy rioya qilgan holda olib borilmoqda. Ish joylari holatini kuzatish tizimlari va avtomatlashtirilgan boshqaruv tizimlari kabi ilg‘or texnologiyalarni joriy etish ish joylarida xavflarni kamaytirish va xavfsizlik darajasini oshirishga yordam bermoqda. Mehnat sharoitlarini muntazam tekshirish ehtimoliy tahdidlarni aniqlash va baxtsiz hodisalarning oldini olishga xizmat qilmoqda.

Xavfsizlik texnikasi bo‘yicha yo‘riqnomalar, favqulodda vaziyatlarda harakat qilish va birinchi yordam ko‘rsatish bo‘yicha amaliy mashg‘ulotlar ishchi-xodimlarga turli holatlarni samarali hal qilish imkonini bermoqda. Kombinatda ishchi-xodimlarni uskunalar bilan ishlashga o‘rgatish va yangi texnologiyalarni o‘zlashtirishga katta eʼtibor qaratilishi avariya va baxtsiz hodisalar sonini kamaytirishga xizmat qilmoqda.

Mehnat muhofazasi va xavfsizlik texnikasi talablariga muvofiq, kombinat ishchi-xodimlari kaska, maxsus poyabzal, niqob va himoya kostyumlari kabi zarur shaxsiy himoya vositalari bilan taʼminlangan. Tibbiy yordamdan foydalanish va muntazam tibbiy ko‘riklarni tashkil etish ish sharoitlari bilan bog‘liq kasalliklarni o‘z vaqtida aniqlash va davolashga yordam bermoqda. Bunda, shak-shubhasiz, baxtsiz hodisalar to‘g‘risidagi maʼlumotlarni muntazam tahlil qilish va ularning yashirin sabablarini aniqlash mehnatni muhofaza qilish tartib-qoidalarini takomillashtirishning asosiy mezonidir. Kombinatda bu kabi “Oltin qoidalar” (buzilishiga mutlaqo yo‘l qo‘yilmaydigan) va rag‘batlantirish tizimi joriy etilishi esa har qanday holatning oldini olishni taʼminlamoqda.

Bo‘linmalarda mehnat muhofazasi bo‘yicha haftalik yig‘ilishlar, shu jumladan, so‘rovlar va muhokamalar orqali mehnatni tashkil etishdagi o‘ziga xos xususiyatlarni aniqlash bo‘yicha takliflar olinayotgani ishni samarali yo‘lga qo‘yishga xizmat qilmoqda. Ishchi-xodimlarni ularning ishi va mehnatni muhofaza qilish bilan bog‘liq qarorlar qabul qilish jarayoniga jalb qilish korxona faoliyatining umumiy samaradorligini oshirish uchun ham muhimdir.

Kombinat bo‘linmalarida har chorak yakuni bo‘yicha mehnat muhofazasi va xavfsizlik texnikasi talablariga rioya qilishda yuqori natijaga erishgan hamda belgilangan ishlab chiqarish rejalarini bajargan mehnat jamoalarini rag‘batlantirish tartibi yo‘lga qo‘yilib, eng namunali mehnat jamoalarini mukofotlash amalga oshirilmoqda.

Kombinatda nazorat varaqalarini to‘ldirish va dalolatnoma-ko‘rsatmalarni shakllantirish orqali mehnat muhofazasi va xavfsizlik texnikasi qoidalariga rioya etilishi yuzasidan ish o‘rinlarini inspeksiya tekshiruvidan o‘tkazishning yangi elektron dasturi joriy etildi. Bu orqali muammoli masalalar doirasini aniqlash uchun har oyda inspeksiya tekshiruvi natijalari tahlil qilib borilmoqda. To‘plangan maʼlumotlar va inspeksiya tekshiruvi natijalarining tahlili asosida rahbariyat ish o‘rinlarida mehnat sharoitlari va xavfsizligini yaxshilash bo‘yicha zarur chora-tadbirlar to‘g‘risida qaror qabul qilishga mustahkam zamin yaratmoqda.

Yuqorida ko‘rsatilgan maqsadlarga erishish uchun kombinatda quyidagilar joriy etilmoqda:

mehnat muhofazasi, xavfsizlik texnikasi, sanoat xavfsiziligi yo‘nalishlari bo‘yicha bilimlarni tekshirishning avtomatlashtirilgan kompyuter tizimiga ega bo‘lgan o‘qitish va mustaqil tayyorlanishning yangi tizimi;
maʼlumotlar sifatini yaxshilash, shaffoflikni oshirish hamda korxonada xavfsizlik madaniyatini shakllantirishga yordam beradigan “Videotahlil asosida shaxsiy himoya vositalari va xavfli zonalarni nazorat qilish” yangi axborot tizimi;
hodisalar takrorlanishining oldini olish va boshqa ishlab chiqarish uchastkalarining o‘xshash joylariga tarqalishining oldini olish maqsadida hodisalarning yashirin sabablarini aniqlash uchun hodisalarni ichki tekshirish.

Ishchi-xodimlar hayotiga g‘amxo‘rlik qilish mehnatni muhofaza qilishga qaratilgan yondashuvdan boshlanadi. Faqatgina ushbu jihatlarga tizimli va izchil yondashish bilan xavflarni kamaytirish, xodimlarning hayotini asrash va kompaniyaning muvaffaqiyatli rivojlanishini taʼminlashi shubhasiz.

“NKMK” AJ Matbuot xizmati