Navoiy kon-metallurgiya kombinati bo‘linmalari tarkibida laboratoriyalar mavjud bo‘lib, ularning har biri aniq belgilangan vazifalarni bajarib kelmoqda.

Birgina, Navoiy mashinasozlik zavodida ana shunday uchta laboratoriya ishlab kelmoqda. Zavod markaziy laboratoriyasi har xil metallarga doir tahlillarni amalga oshirib kelmoqda. Ushbu laboratoriyada ayni paytda 50 nafarga yaqin malakali mutaxassis faoliyat ko‘rsatmoqda. Ularning asosiy vazifasi – Quyuv sexida ishlatiladigan har bir metall tarkibini tekshirib, bir sutkada 60 ga yaqin namunani tahlil-sinovdan o‘tkazish, metallar tarkibidagi elementlarni aniqlash va yaroqliliga xulosa berishdan iboratdir.

Mazkur laboratoriya O‘zbekiston Respublikasi davlat standarti asosida tahlil olib borish huquqini beruvchi tegishli sertifikatga ega. Jamoada 6 nafar mutaxassis – Rustam Hamdamov, Safarali Norbekov, Alijon Nizomiddinov, Mansurjon Berdiyarov, Shoira Ashurova, Surayyo Po‘latovalar Texnik jihatdan tartibga solish agentligining O‘zbekiston standartlar institutida malaka oshirgan.

Laboratoriya boshlig‘i Rustam Hamdamov taʼkidlaganidek:

“Biz Navoiy mashinasozlik zavodida ishlatiladigan metallarning mexanik xossalarini tekshiramiz. Bundan tashqari, shaxtalarda ishlatiladigan arqonlarni sinovdan o‘tkazib, xulosa beramiz. Laboratoriyamizga Germaniyadan olib kelib o‘rnatilgan metall tekshiruvchi uskuna kombinatda yagona hisoblanadi. Shveysariyadan keltirilgan sinov mashinasi ham mavjud. Hozirda nafaqat kombinat uchun, balki shartnoma asosida “Qizilqumsement” AJ va “Navoiyazot” AJlar uchun ham metallarni laboratoriya tekshiruvidan o‘tkazish bo‘yicha ham xizmat ko‘rsatayapmiz.”

Shuningdek, kombinat bo‘linmalaridan bu yerga turli asbob-uskunalarning ishdan chiqqan ehtiyot qismlari olib kelinib, ularning kimyoviy tarkibi laboratoriya mutaxassislari tomonidan aniqlanadi. Natijalarga ko‘ra texnologlar va konstruktorlar ushbu ehtiyot qismlar uchun kerakli metall yoki qotishmaning o‘xshashini yaratishadi.

So‘nggi vaqtda eng ko‘p buyurtmalar Markaziy kon boshqarmasining Oltinni uyumda ishqorlash sexidan kelib tushgan, chunki bu korxonadagi uskunalarda asosan import detallar ishlatiladi. Bu kabi buyurtmalarni bajarish tufayli Navoiy mashinasozlik zavodida import o‘rnini bosuvchi ko‘plab ehtiyot qismlarni ishlab chiqarish yo‘lga qo‘yildi.

“NKMK” AJ Matbuot xizmati.