Keyingi yillarda Navoiy kon-metallurgiya kombinatining Shimoliy kon boshqarmasi tomonidan “Qoqpatas va Dovg‘istov oltin konlarida maʼdan qazib olish (III navbati)” kabi muhim ahamiyatga ega investitsion loyiha bosqichma-bosqich amalga oshirilmoqda.

2025-yilda mazkur loyiha doirasida bajarilgan ishlar natijasida Shimoliy kon boshqarmasi bo‘yicha 140 mln. kubometrdan ortiq tog‘ jinslari qazib olinib, qariyb 16 mln. tonna maʼdan qayta ishlandi. Xususan, “Dovg‘istov” konida o‘tgan yilda tog‘ jinslarini qazib olish hajmi 2024-yilga taqqoslaganda 15 foizga oshdi. 3-gidrometallurgiya zavodida yangi maydalash tegirmonlari ishga tushirilib, korxonaning yillik maʼdan qayta ishlash quvvati 10 mln. tonnaga yetkazildi. Konchilik texnikalari tarkibi muntazam yangilanib, yuqori texnik-iqtisodiy ko‘rsatkichlarga ega “Komatsu”, “Hitachi”, “Liebherr” rusumli gidravlik ekskavatorlar hamda zamonaviy burg‘ilash uskunalari, avtoag‘dargichlar keltirildi.

Ushbu investitsion loyiha bo‘yicha olib borilayotgan ishlar nafaqat maʼdan qazib olish va mahsulot ishlab chiqarish hajmlarini oshirishga, balqi yangi ish o‘rinlarini yaratish, ishchi-xodimlar uchun ish va yashash sharoitlarini yaxshilashga ham xizmat qilmoqda. Jumladan, 2025-yilda Qizilqum kengliklarida joylashgan “Dovg‘istov” koni ishchilari uchun 174 o‘rinli yotoqxona, maishiy sharoitlariga ega 80 o‘rinli oshxona, 154 o‘rinli yuvinish va kiyinish xonalari va boshqa zaruriy imkoniyatlarga ega majmua foydalanishga topshirildi. “Sharqiy” koni ishchi-xodimlari uchun 250 o‘rinli oshxona, 3-gidrometallurgiya zavodi hududida Shimoliy kon boshqarmasining Markaziy fizika, kimyo va biologik laboratoriyasining yangi binosi ishga tushirildi.

Hozirgi vaqtda “Qoqpatas” va “Dovg‘iztov” konlarining oltin tarkibli maʼdan zahiralarini tasdiqlash bo‘yicha geologiya-qidiruv ishlari olib borilmoqda.

“NKMK” AJ Matbuot xizmati