Bugungi kunda Navoiy kon-metallurgiya kombinatining “Qizilqum” kon boshqarmasi tarkibidagi “Pistali”, “Qoraqo‘ton”, “Arslontov” konlarida olib borilayotgan ochiq va yer osti kon ishlarida qazib chiqarilayotgan oltin tarkibli maʼdan 1-, 6-gidrometallurgiya zavodlarida qayta ishlanmoqda.

Ishlab chiqarish jarayonlarining texnik va texnologik yangilanish natijasida 1-GMZ da ma’danni qayta ishlash yillik ko‘rsatkichi 1,9 mln. tonnadan, 6-GMZ da esa 5 mln. tonnadan ortiqni tashkil etyapti. Istiqbolli ma’dan manbalarini o‘rganish tufayli yangi konlar ochilmoqda. Jumladan, joriy yilda “Pistali” koni maydonida “2-G‘arbiy Pistali” karyeri foydalanishga topshirildi.

Kon boshqarmasi jamoasining fidokorona mehnati tufayli korxonada joriy yilning o‘tgan yetti oyida ma’danni qazib olish rejasi 103,4 foizga, qayta ishlash rejasi 101 foizga, tayyor mahsulot ishlab chiqarish rejasi 106,3 foizga bajarildi. Kon va texnologik ta’mirlash sexida o‘tgan davrda karyer va shaxta texnikasi uchun import o‘rnini bosuvchi 56 turdagi 322 ta ehtiyot qism ishlab chiqarildi. Energoresurslardan samarali foydalanish hisobiga 29 mlrd. so‘mdan ortiq iqtisodiy tejamkorlikka erishildi.

Qariyb 4 ming nafar ishchi-xodim mehnat qilayotgan “Qizilqum” kon boshqarmasi jamoasining 30 foizini yoshlar tashkil etishadi. Davr talabidan kelib chiqib nafaqat asosiy ishlab chiqarishni kengaytirish, balki ijtimoiy sohani rivojlantirishga ham yetarli e’tibor berilyapti. Korxona ishchi-xizmatchilariga munosib mehnat va yashash sharoitlarini ta’minlash maqsadida masofadagi konlarda ishlaydigan ishchilar yaxshi yashashi va unumli ishlashi uchun barcha sharoitlar yaratilgan.

Xususan, “Pistali” maydoni hududidagi vaxta shaharchasida 500 o‘rinli yotoqxona, oshxona, tibbiyot xonasi, savdo do‘koni, sport zali, mini-futbol maydoni qurilgan. “Pistali” koni, 6-gidrometallurgiya zavodi, avtogaraj, yordamchi uchastkalar ishchi-xizmatchilari, xotin-qizlar, texnik xodimlar uchun barpo etilgan korpuslarda barcha qulayliklar yaratilgan.

Avazxon EZOZXONOV,

“NKMK” AJ “Qizilqum” kon boshqarmasi direktori