Navoiy kon-metallurgiya kombinati tomonidan “Muruntov” oltin konini o‘zlashtirish bo‘yicha amalga oshirilayotgan investitsion loyihalar korxonada qimmatbaho metallar ishlab chiqarish hajmini oshirishda muhim ahamiyat ega. Jumladan, “Muruntov” konini o‘zlashtirish V navbat 1-bosqich” loyihasi 2017-2026-yillarga mo‘ljallangan bo‘lsada, 2025-yil yakuni bo‘yicha to‘liq amalga oshirildi.

Ushbu loyiha doirasida 733,9 mln. dollar miqdorida investitsiya jalb qilinib, texnologik jihozlar va kon qurilmalari keltirildi, qurilish-montaj ishlari bajarildi. Kon hududida 6 ta nimstansiya, 15 ta transformator, 50 kilometr uzunlikdagi elektr uzatish tarmoqlari, 4 kilometr masofali temir yo‘llar, 3 kilometrlik konveyyer liniyalari qurildi. 1 472 ta yangi ish o‘rni yaratildi.

O‘tgan yilda kombinatning tajribali mutaxassislari va “Muruntov” koni jamoasi tomonidan bajarilgan texnik va texnologik yechimlar ishlab chiqarish ko‘rsatkichlarining yaxshilanishiga olib keldi. Tashkiliy tadbirlar, mutaxassislar salohiyati va bor imkoniyatlardan oqilona foydalanish tufayli konda tog‘ jinslari va ma’dan qazib olish, ma’danlarni 2-gidrometallurgiya zavodiga yetkazib berish yillik rejasi bajarildi.

Keyingi yillarda Avtomobil transporti boshqarmasi tomonidan bajarilayotgan ish hajmi kengayib bormoqda. Boshqarmaga 2025-yilda 40 dan ortiq har xil turdagi yangi kon texnikalari olib kelindi. Avtoag‘dargichlar bosqichma-bosqich 220 tonnagacha yuk ko‘tarish quvvatli “CAT-793D” va “HITACHI EH4000AS-3” rusumli zamonaviy texnikalarga almashtirilmoqda. Yuk ko‘tarish quvvati 254 tonna bo‘lgan 10 ta “Komatsu 860E-1K” rusumli avtoag‘dargichlar olib kelindi. Bu texnikalar mutaxassislarimiz tomonidan yig‘ilib, “Muruntov” konida foydalanishga topshirildi. 2026-yilda yana 40 dan ortiq turli xil yangi kon texnikalari keltirilishi rejalashtirilgan. Avtotransport parki yangilanishi natijasida o‘tgan yilda “Muruntov” konidan 120 mln. kubometr tog‘ jinslarini tashish hamda yoqilg‘i-moylash materiallari va ehtiyot qismlarini tejash hisobidan iqtisodiy samaradorlikka erishildi.

“Muruntov” koniga yangi texnikalarni keltirish iqtisodiy ko‘rsatkichlarni belgilangan darajada saqlab qolgan holda tog‘ jinslari va ma’dan qazib chiqarishni ko‘paytirish imkonini bermoqda.

“NKMK” AJ Matbuot xizmati