Navoiy kon-metallurgiya kombinatida tog‘ jinslarini qazib olish va qimmatbaho metallar ishlab chiqarish hajmlarini oshirishda “Muruntov” oltin konini o‘zlashtirish bo‘yicha amalga oshirilayotgan investitsion loyihalar muhim ahamiyat ega.

Taʼkidlash kerakki, kon chuqurlashishi natijasida qazib olinayotgan tog‘ jinslarini doimiy va vaqtinchalik saqlash joylariga yetkazishda ish samaradorligini oshirish, vaqt hamda xarajat miqdorini qisqartirish uchun davriy oqim texnologiya majmualaridan keng foydalanib kelinmoqda.

Bugungi kunda amalga oshirilayotgan “Muruntov” konini o‘zlashtirishning V navbati 1-bosqich investitsiya loyihasi doirasida konning janubiy yon tomonida davriy oqim texnologiya majmuasini barpo etish bo‘yicha qurilish-montaj ishlari olib borilmoqda. Xususan, 2 ta maydalash-yuklash punktining qurilishi, uzunligi 1 500 metr bo‘lgan magistral konveyer va uzunligi 900 metr bo‘lgan ag‘darma konveyerni o‘rnatish ishlari bajarilmoqda.

Ish jarayoni avtomatlashtiriladigan ushbu davriy oqim texnologiyasi majmuasi joriy yilning yakuniga qadar ishga tushirilishi rejalashtirilgan. Majmua to‘liq ishga tushirilgandan so‘ng avtoag‘dargichlarning tog‘ jinslarini tashish masofasi qisqarishi, dizel yoqilg‘isi sarfi hamda atrof-muhit va atmosferaga chang-gaz tarqalishining kamayishiga olib keladi.

Majmua uchun kerakli asbob-uskunalar kombinatning Navoiy mashinasozlik zavodi va Markaziy kon boshqarmasining Zarafshon taʼmirlash-mexanika zavodida to‘liq mahalliylashtirilgan holda tayyorlanmoqda. Qurilish-montaj ishlari Zarafshon qurilish boshqarmasi tomonidan olib borilmoqda.

“NKMK” AJ Matbuot xizmati