“Muruntov” konida ishlab chiqarish rejasini o‘z vaqtida bajarilishini taʼminlash, ish unumdorligini oshirishda zamonaviy konchilik texnikalarning o‘rni katta. Shu maqsadda, yaqinda kovshining hajmi 20 kubometr bo‘lgan ikkita zamonaviy ekskavator keltirildi. Bu bilan konda elektr tokida ishlaydigan va gidravlik ekskavatorlarning soni 42 taga yetdi.

Taʼkidlash kerakki, kon jamoasi tog‘ jinslarini qazib olish rejasini muddatidan oldin bajarib kelmoqda. Misol uchun, 2024-yilda 97,8 mln. kubometr tog‘ jinsi qazib chiqarilgan bo‘lsa, 2025-yilning olti oyida qariyb 50 mln. kubometr tog‘ jinslari qazib olindi.

- “Muruntov” konida ekskavatorlar, burg‘ilash uskunalari kabi 68 ta konchilik texnikasi ishlab chiqarishga jalb etilgan bo‘lib, ular yordamida tog‘ jinslari qazib olish ishlari amalga oshirilmoqda. Konni o‘zlashtirishning 5-navbati ikkinchi bosqichi investitsiya loyihasi doirasida kelgusida shu kabi texnikalar yana keltiriladi, - deydi kon bosh mexanigi Ravshan Pinazarov.

Kon uskunalarini taʼmirlash sexida bugungi kunda 400 nafardan ziyod mutaxassis faoliyat yuritmoqda. Hozirda texnikalarning soni oshishi evaziga ularga sifatli xizmat ko‘rsatish uchun qo‘shimcha 50 ta ish o‘rni yaratilmoqda.

“NKMK” AJ Matbuot xizmati