Navoiy kon-metallurgiya kombinatida transport sohasini rivojlantirish, korxona bo‘linmalarida foydalanilayotgan og‘ir yuk tashuvchi avtoag‘dargichlar va konchilik texnikalari tarkibini muntazam yangilab borishga alohida eʼtibor qaratilmoqda.

Xususan, keyingi yillarda “Muruntov” konini o‘zlashtirish bo‘yicha amalga oshirilayotgan investitsion loyihalar doirasida kombinatning yirik avtokorxonasi – Markaziy kon boshqarmasi tarkibidagi Avtomobil transporti boshqarmasiga zamonaviy, yuqori texnik-iqtisodiy ko‘rsatkichlarga ega og‘ir yuk tashuvchi avtoag‘dargichlar keltirilmoqda.

Bugungi kunda mazkur avtokorxonaga Yaponiyada ishlab chiqarilgan yuk ko‘tarish quvvati 221 tonna bo‘lgan “HITACHI EH4000AS-3” rusumli 3 ta kon avtoag‘dargichi keltirilib, “Muruntov” konida tog‘ jinslarini tashish jarayonida foydalanilmoqda. Taʼkidlash kerakki, korxonaga bu kabi rusumli avtoag‘dargichlar ilk bor olib kelindi.

- Mazkur rusumdagi avtoag‘dargich kabinasida haydovchi uchun barcha sharoit va qulayliklar yaratilgan. Boshqaruv tizimi to‘liq avtomatlashtirilgan bo‘lib, bu haydovchiga mashinani qiyinchiliklarsiz boshqarish imkonini beradi. Harakatlanish vaqtida yon-atrofni 360 gradus radiusda kuzatish imkoniyatiga ega zamonaviy videokuzatuv kameralari bilan jihozlangan, - deydi MKB Avtomobil transporti boshqarmasi bo‘lim boshlig‘i M.Normirzayev.

Joriy yil yakuniga qadar transport boshqarmasiga yuk ko‘tarish quvvati 221 tonna bo‘lgan “HITACHI EH4000AS-3” rusumli yana 2 ta avtoag‘dargich olib kelinishi rejalashtirilgan.

“NKMK” AJ Matbuot xizmati