Navoiy kon-metallurgiya kombinatida transport sohasi muhim ahamiyat kasb etadi. So‘nggi yillarda korxona bo‘linmalarida oltin tarkibli maʼdanlarni konlardan qazib olish va yuklashda foydalanilayotgan konchilik texnikalari tarkibini muntazam yangilab borishga alohida eʼtibor qaratilmoqda.

Keyingi yillarda “Muruntov” konini o‘zlashtirish bo‘yicha amalga oshirilayotgan investitsion loyihalar doirasida konda qazib olinayotgan tog‘ jinslarini doimiy va vaqtinchalik saqlash joylariga yetkazishda tashish masofasi bilan bog‘liq vaqt hamda xarajatlarni qisqartirish dolzarb masala hisoblanadi. Bu masalani hal etish maqsadida Markaziy kon boshqarmasi tarkibidagi Avtomobil transporti boshqarmasiga zamonaviy, yuqori texnik-iqtisodiy ko‘rsatkichlarga ega ekskavatorlar, og‘ir yuk tashuvchi avtoag‘dargichlar, buldozerlar, yukortgichlar va avtogreyderlar keltirilmoqda.

Korxonaning avtotransport parki yangilanishi natijasida joriy yil yakuniga qadar “Muruntov” konidan 104 mln. kubometr tog‘ jinslarini tashish, shuningdek yoqilg‘i-moylash materiallari va ehtiyot qismlarini tejash hisobidan tannarxni pasaytirish rejalashtirilgan.

- 2025-yilning o‘tgan davrida korxonamizga qariyb 40 ta turli rusumli avtotransport vositalari keltirildi. Xususan, yaqinda yuk ko‘tarish quvvati 254 tonna bo‘lgan “Komatsu 860E-1K” rusumli 10 ta avtoag‘dargich olib kelindi. Shundan 2 tasi mutaxassislarimiz tomonidan yig‘ilib, “Muruntov” konida tog‘ jinslarini tashish jarayonida foydalanilmoqda. Shuningdek, noyabr oyida “Liebherr” rusumli 2 ta buldozer keltirilib, foydalanishga topshirildi, - deydi Avtomobil transporti boshqarmasi boshlig‘i Shuhrat Mavlonov.

Avtotransport vositalari uchun zaruriy import ehtiyot qismlar mahalliylashtirilib, ularni kombinatning Navoiy mashinasozlik zavodi, Markaziy kon boshqarmasi bo‘linmalari hamda maxalliy ishlab chiqaruvchi korxonalarda taʼmirlash va tayyorlash yo‘lga qo‘yilgan.

Taʼkidlash kerakki, kombinat korxonalarida konchilik ishlarini amalga oshirishda zamonaviy avtotransport vositalaridan foydalanish yuqori ish unumdorligini taʼminlashga xizmat qilmoqda.

“NKMK” AJ Matbuot xizmati