Navoiy kon-metallurgiya kombinati tomonidan qimmatbaho metallar ishlab chiqarish hajmini oshirishda “Muruntov” oltin konini o‘zlashtirish bo‘yicha amalga oshirilayotgan investitsion loyihalar muhim ahamiyat kasb etadi.

Bugungi kunda dunyodagi eng yirik ochiq konlardan biri bo‘lgan “Muruntov” konining uzunligi 5,5 kilometr, kengligi 3,4 kilometr, chuqurligi 675 metrdan ortiq. Konni o‘zlashtirishning V navbati 1-bosqich investitsiya loyihasi doirasida qo‘llanilayotgan kon-geologik va kon-texnik yechimlar kelajakda kon chuqurligini 1 000 metrgacha yetkazish imkonini beradi.

Mazkur kon chuqurlashishi natijasida qazib olinayotgan tog‘ jinslarini doimiy va vaqtinchalik saqlash joylariga yetkazishda ish samaradorligini oshirish, vaqt hamda xarajat miqdorini qisqartirish uchun davriy oqim texnologiya majmualaridan keng foydalanib kelinmoqda. Taʼkidlash kerakki, 2024-yilda kondan 97,8 mln. kubometr tog‘ jinslari qazib chiqarilgan bo‘lsa, joriy yilning olti oyida ushbu ko‘rsatkich qariyb 50 mln. kubometrni tashkil etdi.

Hozirda konning janubiy yon tomonida davriy oqim texnologiya majmuasini barpo etish bo‘yicha qurilish-montaj ishlari olib borilmoqda. Xususan, 2 ta maydalash-yuklash punktining qurilishi, uzunligi 1 500 metr bo‘lgan magistral konveyer va uzunligi 900 metr bo‘lgan ag‘darma konveyer qurilishi amalga oshirilmoqda. Konveyerlar kombinatning Navoiy mashinasozlik zavodi va Markaziy kon boshqarmasining Zarafshon taʼmirlash-mexanika zavodida to‘liq mahalliylashtirilgan holda tayyorlanmoqda.

Amalga oshirilayotgan loyihalar ish samaradorligini yanada oshirish va ishlab chiqarishning yuqori darajasiga erishishga qaratilgan. “Muruntov” konini o‘zlashtirishning V navbati 2-bosqich yirik investitsiya loyihasi bo‘yicha texnik iqtisodiy asoslar ishlab chiqildi. Ushbu investitsiya loyihasini amalga oshirish natijasida kondan yiliga 60 mln. tonna oltin tarkibli maʼdanni 2-gidrometallurgiya zavodiga yetkazish rejalashtirilgan.

“NKMK” AJ Matbuot xizmati