Tog‘-kon sanoatidagi Xalqaro ayollar kuni munosabati bilan “International Women in Mining” (“IWiM” – tog‘-kon sanoatidagi Xalqaro ayollar tashkiloti) ning yillik uchrashuvi onlayn tarzda o‘tkazildi. Ushbu uchrashuvda “Navoiy kon-metallurgiya kombinati” AJ vakili – Tashkiliy rivojlanish bo‘limi boshlig‘i Raʼno Qosimova 2025-2026-yillarga “IWIM” elchisi etib saylandi.

NKMK “IWIM” ga 2024-yilda hamkor sifatida qo‘shilib, inklyuzivlik va barqaror rivojlanish tamoyillariga amal qilishini eʼlon qildi. Kompaniyada ilg‘or xalqaro tajribalarni korxonada moslashtirish bo‘yicha chora-tadbirlar amalga oshirilmoqda.

Kombinatda ishlaydigan xotin-qizlar bilan qayta aloqani o‘rnatish maqsadida ishlab chiqarish obyektlariga muntazam tashriflar hamda Ayollar Kengashi faoliyati kompaniyaning asosiy tashabbuslaridir. Mazkur yo‘nalishdagi muhim qadamlardan biri har yili o‘tkaziladigan O‘zbekiston xalqaro kon-metallurgiya forumi (UIMF) doirasida ishga tushirilgan “Metallurgiyada ayollar ovozi” platformasi bo‘ldi. Ushbu platforma tog‘-kon sanoatida xotin-qizlar o‘rtasida o‘zaro hamkorlikni mustahkamlash, g‘oyalar va tajriba almashishga ko‘maklashadi. Bu platforma qo‘llab-quvvatlanib, forum dasturiga kiritildi.

Tog‘-kon sanoatidagi Xalqaro ayollar kuniga bag‘ishlangan tadbirda Raʼno Qosimova quyidagilarni taʼkidladi:

“Markaziy Osiyo ayollarining xalqaro maydondagi mavqei, ayniqsa, barqaror rivojlanish, inklyuzivlik va yetakchilik masalalarida tobora oshib bormoqda. NKMK ushbu jarayonga o‘z hissasini qo‘shayotganidan faxrlanamiz. “IWIM” elchisi sifatida bizning vazifamiz O‘zbekiston va Markaziy Osiyo mintaqasining “Women in Mining” xalqaro harakatiga yanada yaqinroq integratsiyalashuviga hissa qo‘shishdir. Birgalikda biz ayollar hamkorlik qiladigan, ilhomlantiradigan va tog‘-kon sanoatini o‘zgartiradigan kelajakni shakllantira olamiz.”

“International Women in Mining” (“IWiM”) – tog‘-kon sanoatidagi Xalqaro ayollar tashkiloti 2007-yilda tashkil etilgan xalqaro notijorat tashkilotdir. “IWiM” tog‘-kon sanoatida gender tenglik sohasidagi global o‘zgarishlarni qo‘llab-quvvatlash va rag‘batlantirish bo‘yicha ishlaydi va bugungi kunda butun dunyo bo‘ylab 70 dan ortiq soha tashkilotlarini birlashtiradi.

“NKMK” AJ Matbuot xizmati