8-11-sentabr kunlari Xitoy Xalq Respublikasining Syamen shahrida “CIFIT-25” yigirma beshinchi Xitoy xalqaro investitsiya va savdo yarmarkasi o‘tkazilmoqda. Ushbu yirik xalqaro tadbir dunyodagi eng nufuzli investitsiya va savdo maydonlaridan biri bo‘lib, har yili yuzlab mamlakatlarning yirik kompaniyalari va tashkilotlari vakillarini birlashtiradi.

Joriy yilda O‘zbekiston Respublikasi delegatsiyasi ham mazkur yarmarkada ishtirok etmoqda. “Made in Uzbekistan” brendi ostida milliy pavilyon tashkil etilib, unda mamlakatimizdagi qator yirik sanoat korxonalari, kichik va o‘rta biznes subyektlari, eksportchi kompaniyalar va investitsiya tashkilotlari tomonidan ishlab chiqarilayotgan mahsulotlar, investitsiya loyihalari va hamkorlik imkoniyatlari namoyish etilmoqda. Bu esa mamlakatimizning xalqaro nufuzini yanada oshirish, milliy ishlab chiqaruvchilarning jahon bozoridagi mavqeini mustahkamlashga xizmat qilmoqda.

O‘zbekiston delegatsiyasi tarkibida “Navoiy kon-metallurgiya kombinati” AJ vakillari ham ushbu xalqaro yarmarkada qatnashmoqda. Kombinat vakillari tadbir ishtirokchilariga korxonada amalga oshirilayotgan modernizatsiya ishlari, innovatsiya va ishlab chiqarish samaradorligini oshirish yo‘nalishidagi loyihalar haqida maʼlumot berishmoqda. Shu bilan birga, xalqaro hamkorlar bilan qo‘shma loyihalarni amalga oshirish va texnologik hamkorlikni yo‘lga qo‘yish imkoniyatlari muhokama etilmoqda.

“CIFIT-25” yarmarkasi doirasida turli xalqaro forumlar, investitsiya sessiyalari va biznes uchrashuvlar o‘tkazilishi rejalashtirilgan.

“NKMK” AJ Matbuot xizmati