30-31-may kunlari futzal bo‘yicha “Tog‘-kon sanoati va geologiya vaziri kubogi” uchun turnir o‘tkazildi. Dastlab musobaqalarda ishtirok etadigan jamoalar uchun qur’a tashlash marosimi bo‘lib o‘tdi.

30-may kuni Kon-geologiya vazirligi hamda uning tizimosti korxonalari xodimlari ishtirokida jami 18 ta jamoa kubok uchun bahslarga kirishdi. Musobaqaning birinchi kunida yarim final bosqichida ishtirok etadigan 4 ta jamoa nomi ma’lum bo‘ldi. 31-mayda Vazir kubogi uchun yarim final, 3-o‘rin uchun hamda final o‘yinlari o‘tkazildi. Mazkur turnirda Navoiy kon-metallurgiya kombinati jamoasi ham ishtirok etib, final o‘yinida qatnashdi.

Final uchrashuvida “NKMK” AJ va “OKMK” AJ kubok g‘olibligi uchun bahsga kirishdi, murosasiz o‘yinning asosiy vaqtida durang kuzatildi, “omad lotoreyasi”da “Navoiy kon-metallurgiya kombinati” AJ jamoasi g‘alabaga erishdi.

Musobaqalar yakunlangach, Kon-geologiya vaziri B.Islamov g‘olib va sovrindorlarga sovg‘alar hamda kubokni tantanali ravishda topshirdi.

“NKMK” AJ Matbuot xizmati.