24-25-iyun kunlari Toshkent shahrida “MINEX Central Asia 2025” 11-xalqaro forumi o‘tkazilmoqda. Mazkur forum O‘zbekiston Respublikasi Tog‘-kon sanoati va geologiya vazirligi tomonidan “Muhim mineral resurslarning global xavfsizligida Markaziy Osiyoning o‘rnini mustahkamlash” shiori ostida tashkil etildi.

Ushbu forumda Markaziy Osiyo, Yevropa, Osiyoning 20 ta mamlakatidan kompaniyalar vakillari bilan bir qatorda, “Navoiy kon-metallurgiya kombinati” AJ delegatsiyasi ham ishtirok etmoqda. “Strategik hamkorlik uchun sarmoyaviy jozibador tuzilmani yaratish” mavzusidagi panel sessiyasida “NKMK” AJ bosh direktorining iqtisod va moliya bo‘yicha o‘rinbosari Jahongir Xasanov maʼruza qildi.

J.Xasanov o‘z maʼruzasida tog‘-kon sanoati va Navoiy kon-metallurgiya kombinati mamlakatimizning iqtisodiy rivojlanishi markazida bo‘lib, mineral-xom ashyo bazasi, infratuzilma va inson kapitalini rivojlantirishga investitsiyalar kirib kelishini rag‘batlantirishini taʼkidladi. 2024 va 2025-yillarda xalqaro obligatsiyalarning muvaffaqiyatli joylashtirilishi kompaniyaning investitsiyaviy jozibadorligini mustahkamlashda muhim ahamiyatga ega.

“MINEX Central Asia 2025” 11-xalqaro forumi geologiya-qidiruv va taʼminot zanjiri barqarorligidan tortib, mintaqadagi tog‘-kon sanoatida jarayonlarni raqamlashtirish va kadrlar tayyorlashgacha bo‘lgan asosiy masalalarni muhokama qilish uchun muhim platformaga aylandi.

NKMKning ushbu forumdagi ishtiroki kompaniyaning ochiqlikka intilishi, xalqaro standartlarga rioya qilishi va global miqyosda strategik hamkorlikka tayyorligini ifodalaydi.

“NKMK” AJ Mabuot xizmati