Joriy yilning 21-28-iyul kunlari Tog‘-kon sanoati va geologiya vazirligi tomonidan O‘zbekiston va Xitoy o‘rtasidagi yashil foydali qazilmalar sohasidagi hamkorlik forumi o‘tkazilmoqda.

Mazkur forumda rangli va qimmatbaho metallar (oltin, kumush, mis, surma)ni qidirish, qazib olish, qayta ishlash, shuningdek, ushbu yo‘nalishlarda texnologik uskunalar ishlab chiqarish, yirik infratuzilmaviy, energetika va resurslarni boshqarish sohalarida faoliyat olib borayotgan Xitoyning 30 dan ortiq yirik kompaniya vakillari ishtirok etmoqda.

Forum doirasida tadbir ishtirokchilari Navoiy kon-metallurgiya kombinati faoliyati bilan yaqindan tanishish uchun “NKMK tarixi” muzeyi va Navoiy mashinasozlik zavodiga tashrif buyurdilar.

- NKMK dunyo tog‘-kon sanoatida yuqori salohiyatga ega. O‘zbekiston kompaniyasida keyingi yillarda amalga oshirilgan ishlar, kelgusidagi rivojlantirish istiqbollari to‘g‘risida keng maʼlumotlarga ega bo‘ldik, - deydi Xitoy tadbirkorlarining O‘zbekistondagi assotsiatsiyasi bo‘lim boshlig‘i Meng Fanyu.

Tashrif davomida kombinatning ishlab chiqarish va iqtisodiy salohiyatini namoyon etuvchi taqdimot va videorolik namoyish etildi.

“NKMK” AJ Matbuot xizmati