Navoiy kon-metallurgiya kombinatining “Qizilqum” kon boshqarmasi tarkibidagi “Pistali” koni jamoasi tomonidan 2025-yildagi tog‘ jinslarni qazib olish va oltin tarkibli maʼdanni qayta ishlash uchun 6-gidrometallurgiya zavodiga yetkazish rejalari muddatidan oldin bajarilgani eʼtirofga sazavordir.

Xususan, o‘tgan yilda 16,7 mln. kubometr tog‘ jinslari qazib chiqarilgan bo‘lsa, joriy yilda ushbu ko‘rsatkichni 21,5 mln. kubometrga yetkazish mo‘ljallangan. Shu bilan birga, burg‘ulash ishlari bo‘yicha ham sezilarli o‘sish qayd etilib, 1,2 mln. pogona metr burg‘ilash ishlari amalga oshirildi.

460 nafardan ortiq ishchi-xodim mehnat qilayotgan “Pistali” konida ishlab chiqarish rejalarini o‘z vaqtida bajarilishini taʼminlash, ish samaradorligini oshirishda zamonaviy konchilik texnikalarning hissasi katta. Bu ishlarni amalga oshirishda 119 ta turli rusumdagi kon texnikalari, zamonaviy avtoag‘dargichlar, yo‘l-qurilish mexanizmlari, yordamchi transportlar imkoniyatidan keng foydalanilmoqda.

O‘tgan yilda “Pistali” konida konchilik ishlari ko‘lamini kengaytirish bo‘yicha olib borilgan ishlar natijasida “2-G‘arbiy Pistali” koni foydalanishga topshirildi.

Shuningdek, 6-gidrometallurgiya zavodi jamoasi ham 2025-yilda kombinat korxonalari o‘rtasida birinchilardan bo‘lib oltin ishlab chiqarish bo‘yicha yillik rejasini muddatidan oldin bajardi. Jumladan, zavodda 5,1 mln. tonnadan ortiq maʼdan qayta ishlandi. O‘tgan yilda zavodning desorbsiya bo‘limida faollashtirilgan ko‘mirni desorbsiya qilish jarayonidan keyin hosil bo‘ladigan ko‘mir zarrachalarini qayta ishlash tizimi joriy etildi. Ilgari ushbu mahsulot qayta ishlash uchun 3-gidrometallurgiya zavodiga yuborilar edi. Bu, vaqt, sarf-xarajat, mablag‘larni tejash imkonini berdi.

“Qizilqum” kon boshqarmasida maʼdan qazib olish va qayta ishlash ko‘rsatkichlarini yana-da oshirish maqsadida, 2026-yilda “Beshquduq”, “Qopqoqli”, “Oltin diyor”, “Bo‘ztov”, “Yilsoy”, “Baxtli”, “Tulkitov” va “Qumsoy” konlari hududlari o‘rganiladi. Bundan maqsad – ushbu maydonlarda kon ishlarini kengaytirish imkoniyatlarini yaratishdan iborat.

“NKMK” AJ Matbuot xizmati