Nurota tumanidagi “Pistali” konida tog‘ jinslarni qazib olish rejasi muddatidan oldin bajarib kelinayotgani eʼtirofga sazavordir. 2024-yilda 15 mln. kubometr tog‘ jinslari qazib chiqarilgan bo‘lsa, 2025-yil uchun ushbu ko‘rsatkichni 15,5 mln. kubometrga yetkazish belgilangan. Joriy yilning o‘tgan davrida qariyb 7,5 mln. kubometr tog‘ jinslari qazib olinib, reja ko‘rsatgichlari ortig‘i bilan uddalandi.

Shuningdek, “Pistali” konida ishlab chiqarish rejalarini o‘z vaqtida bajarilishini taʼminlash, ish samaradorligini oshirishda zamonaviy konchilik texnikalarning hissasi katta bo‘lmoqda. Yaqinda konga yana 5 dona 55 tonna yuk ko‘tarish quvvatiga ega “Komatsu” rusumli avtoag‘dargich keltirildi va ularni yig‘ish ishlari yakuniga yetmoqda.

– Konda yuk ko‘tarish quvvati 55, 90 tonna bo‘lgan 16 dona “Komatsu” rusumli avtoag‘dargich kunu tun faoliyat yuritayotgan bo‘lsa, ularda bir sutkada o‘rtacha 44 ming kubometrgacha tog‘ jinslari tashilmoqda. Shu kabi 5 ta avtoag‘dargich ishlab chiqarishga jalb etilishi evaziga sutkasiga 50 ming kubometrgacha bo‘lgan tog‘ jinslarini tashish imkoniga ega bo‘lamiz, – deydi “Qizilqum” kon boshqarmasi direktorining transport masalalari bo‘yicha o‘rinbosari Qahramon Boymirzayev.

“NKMK” AJ Matbuot xizmati