O‘zbekiston Respublikasi Oliy Majlisi Qonunchilik palatasi bir guruh deputatlari 26-fevral kuni korxona faoliyati bilan yaqindan tanishish maqsadida Navoiy kon-metallurgiya kombinatiga tashrif buyurishdi.

Ushbu guruh tarkibi Tadbirkorlik, raqobatni rivojlantirish va sanoat masalalari qo‘mitasi raisi B.Bekmurodov, qo‘mita raisi o‘rinbosari F.Zayniyev, qo‘mita aʼzolari N.Sultonov, G.Rayxanova, Ekologiya va atrof-muhitni muhofaza qilish masalalari qo‘mitasi raisi o‘rinbosari B.Aldamuratov, qo‘mita aʼzolari Q.Qosimova, O.Mamadaliyevlardan iborat.

Kombinat boshqarmasida “NKMK” AJ Boshqaruvi raisi – Bosh direktori Q.Sanaqulov va Qonunchilik palatasi deputatlari o‘rtasida uchrashuv o‘tkazildi. Uchrashuvda kombinat faoliyatining keyingi yillardagi rivojlanishi, maʼdan qazib olish, qayta ishlash va mahsulot ishlab chiqarish, mahalliylashtirish, raqamlashtirish, shuningdek, atrof-muhitni muhofaza qilish va ijtimoiy sohada amalga oshirilayotgan ishlar haqida batafsil maʼlumot berildi.

Tadbirkorlik, raqobatni rivojlantirish va sanoat masalalari qo‘mitasi raisi B.Bekmurodov taʼkidlanganidek:

“Qonunchilik palatasi qarori bilan ishlab chiqilgan “Harakatlar dasturi”da Navoiy kon-metallurgiya kombinati faoliyatining ijobiy tajribasini o‘rganish belgilangan. Shunga muvofiq, kombinat faoliyati bilan tanishishni boshladik. Maʼlumki, kombinat mamlakatimiz iqtisodiyotida juda katta mavqeyiga ega. Keyingi yillarda korxonada yirik investitsion loyihalar amalga oshirilganidan xabardormiz.”

Shuningdek, Qonunchilik palatasi deputatlari Navoiy mashinasozlik zavodida bo‘lib, korxonaning ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishtirildi.

Deputatlarning kombinat faoliyati bilan tanishishi davom etmoqda.

“NKMK” AJ Matbuot xizmati.