Navoiy mashinasozlik zavodida metall qo‘yishdan tortib, tayyor mahsulot ishlab chiqarishgacha bo‘lgan uzluksiz tizim yo‘lga qo‘yilgan. Bugunga kunda korxona Navoiy kon-metallurgiya kombinatining mahalliylashtirilgan va import o‘rnini bosuvchi mahsulotlarni ishlab chiqaradigan eng yirik bo‘linmasidir.

Bu kabi mahsulotlarni ishlab chiqarish jarayonida zavodning Quymachilik sexida olib borilgan modernizatsiya muhim ahamiyatga ega. Keyingi yillarda kombinat gidrometallurgiya zavodlarida qo‘llanilayotgan sharli tegirmonlar va kon-shaxta uskunalari uchun ushbu sexda quyma mahsulotlarini tayyorlash hajmini oshirish bo‘yicha keng qo‘lamli ishlar amalga oshirildi. Jumladan, uch yil avval foydalanishga topshirilgan 25 tonnalik zamonaviy metall eritish pechi, qoliplash uchastkasini kengaytirish doirasida ishga tushirilgan ikkita qoliplash mashinasi va yaqinda o‘rnatilgan 50 tonna yuk ko‘taruvchi ko‘prikli kran metall eritish quvvatini yiliga 15-20 foizgacha oshirdi.

- Hozirgi vaqtda Navoiy mashinasozlik zavodida ishlab chiqarilayotgan 7 ming turdagi yuqori aniqlikdagi quyma ehtiyot qismlar Quymachilik sexida tayyorlanayapti. Xususan, sharli tegirmonlarning katta o‘lcham va og‘irlikdagi detallari butunligicha bir marta quyilmoqda. 660 nafardan ortiq ishchi-xodim ishlaydigan sexda quyma mahsulotlarini tayyorlash hajmi yildan yilga oshirilmoqda. 2023-yilda ishlab chiqarilgan mahsulotlar 30 ming tonnani tashkil etgan bo‘lsa, 2025-yil yakuniga kelib bu ko‘rsatkich 33 ming tonnadan oshadi, - deydi Quymachilik sexi boshlig‘i Zafar Bobodo‘stov.

So‘nggi yillarda sexda texnik va texnologik jihatdan yangilashga qaratilgan investitsion loyihalarning amalga oshirilganligi zavodda mahalliylashtirilgan mahsulotlar ishlab chiqarish quvvatlarini oshirishga xizmat qilmoqda.

“NKMK” AJ Matbuot xizmati