Shimoliy kon boshqarmasi Navoiy kon-metallurgiya kombinatining qimmatbaho metallar ishlab chiqarishga ixtisoslashgan yetakchi bo‘linmalaridan biri bo‘lib, uning tarkibidagi “Dovg‘iztov”, “Sharqiy”, “Auminzo-Amantoy”, “Turbay” konlari, 3 va 5-gidrometallurgiya zavodlari, Avtomobil va Temir yo‘l transporti boshqarmalari, yana o‘ndan ortiq sex, laboratoriya, uchastkalarda 14 ming nafardan ziyod ishchi-xodimlar faoliyat olib borishmoqda.

So‘nggi yillarda amalga oshirilgan yirik investitsion loyihalar kon boshqarmasi uchun yangi istiqbollar ochib bermoqda. Jumladan, “Dovg‘iztov” va “Qoqpatas” oltin konlarida ma’dan qazib olish (III navbati)” kabi muhim ahamiyatga molik investitsion loyihasi hisobiga korxonaning ishlab chiqarish quvvati oshdi. Ayni paytda kon boshqarmasi yiliga 15 mln. tonna ma’danni qayta ishlash quvvatiga ega.

Xususan, 3-gidrometallurgiya zavodida 9, 10-biooksidlash modullarining ishga tushirilishi biooksidlash sexining kengayishi hamda ma’danni qayta ishlash quvvatini oshirishga qaratilganligi bilan ahamiyatli. Natijada amaldagi 48 ta bioreaktorga yana 12 ta bioreaktor qo‘shildi. Bu, sulfid konsentratlari ishlab chiqarish hajmini 25 foizga, yarim tayyor mahsulot hajmini 12 foizga oshirish imkonini beryapti.

Ishlab chiqarish rejalarining o‘z vaqtida va sifatli uddalanishi ko‘p jihatdan korxona texnika bazasining muttasil mustahkamlab borilishiga bog‘liq. Kon boshqarmasida og‘ir yuk tashuvchi va konchilik texnikalari yangilanmoqda. Og‘ir yuk tashuvchi texnikalardan unumli foydalanish evaziga yuqori samaradorlikka erishilmoqda. Yil boshidan buyon 45 ta “Komatsu” rusumli avtoag‘dargich keltirilib, ayni paytda ulardan “Qoqpatas”, “Dovg‘iztov” konlari va “Turbay” karyerida foydalanilmoqda. Joriy yil oxiriga qadar yana 6 ta shunday texnika vositalari keltiriladi.

5-gidrometallurgiya zavodi texnologik jarayonlariga ishlab chiqarish ko‘rsatkichlarini yaxshilashga yo‘naltirilgan o‘zgartirishlar kiritilmoqda. Sulfidli ma’danlardan oltin ajratib olishni ko‘paytirish maqsadida flotoboyitmani ishqorli qayta ishlash bo‘yicha sanoat sinovlari olib borilmoqda. Atrof-muhitga chiqariladigan gazlar tarkibidagi zararli moddalarni minimal darajagacha kamaytirish uchun zavodning filtrlash, quritish va kuydirish sexining gaz tozalash bo‘limiga zamonaviy elektrofiltr o‘rnatish mo‘ljallangan.

2025-yilning o‘tgan davrida Shimoliy kon boshqarmasi bo‘linmalarida 15 mlrd. so‘mdan ortiq mahalliylashtirilgan va import o‘rnini bosuvchi mahsulotlar ishlab chiqarildi.

Naim AMONOV,

“NKMK” AJ Shimoliy kon boshqarmasi direktori