So‘nggi yillarda Navoiy kon-metallurgiya kombinatida amalga oshirilgan muhim investitsion loyihalar tarkibida qimmatbaho metallar bo‘lgan maʼdanlarni qazib chiqarish va qayta ishlash quvvatlari hamda mahsulot ishlab chiqarish hajmini oshirish, yangi ish o‘rinlarini yaratishga xizmat qilmoqda.

“Zarmitan konining quyi gorizontlarini o‘zlashtirish” investitsion loyihasi doirasida joriy yilning aprel oyida konda zamonaviy muhandislik inshooti – diametri 6,5 metr va chuqurligi 1 000 metr bo‘lgan “Skipli” shaxta stvoli ishga tushirilgan edi. Ushbu stvol ishga tushirilishi maʼdan qazib olish xarajatlarini kamaytirish hamda 90 ta yangi ish o‘rni va korxona uchun qo‘shimcha qiymat yaratish imkonini berdi. Ayni paytda mazkur inshoot yordamida bir sutkada 1,5 ming tonna maʼdan yer ostidan yer yuzasiga olib chiqilmoqda.

Mazkur investitsion loyiha doirasida yana bir muhandislik inshooti – “Asosiy” stvolning chuqurligi 1 000 metrga yetkazildi. “Asosiy” shaxta stvolidan qazib olingan maʼdanni yer yuzasiga chiqarish bilan birga konchilar va kerakli jihozlarni shaxtaga olib tushish va olib chiqish, yer osti suvlarini yer yuzasiga chiqarish, shaxtani toza havo bilan taʼminlash maqsadida ham foydalaniladi. Ushbu obyekt foydalanishga topshirilishi 0.00 m sathgacha bo‘lgan zaxiralarni qazib olish va undan chuqurlikda joylashgan istiqbolli zaxiralarni o‘rganish va baholash imkonini yaratadi.

Navoiy kon-metallurgiya kombinati va Chexiya Respublikasining “Mine Construction Alliance s.r.o.” kompaniyasi mutaxassislari hamkorligida “Skipli” va “Asosiy” shaxta stvollari ming metrlik chuqurlikda 0.00 m sathda o‘zaro tutashtirildi. Bu, o‘z navbatida, “Zarmitan” koni yer osti uchastkasida toza havo bilan taʼminlashni yaxshilaydi hamda zaxira chiqish yo‘lagi vazifasini bajaradi. “Asosiy” shaxta stvolida olib borilayotgan qurilish ishlarini joriy yil yakuniga qadar tugatish rejalashtirilgan.

“NKMK” AJ Matbuot xizmati