“Navoiy kon-metallurgiya kombinati” aksiyadorlik jamiyati (“NKMK” AJ) “Sustainable Fitch” xalqaro reyting agentligi tomonidan Kompaniyaning korporativ ESG-reytingi ‘3’ darajasida (1 dan 5 gacha bo‘lgan shkalada, bunda 1 – past xavf-xatar darajasi, 5 – yuqori xavf-xatar darajasini anglatadi) tasdiqlangani va umumiy 51 balldan 54 ballgacha (100 balldan) oshirilganini e’lon qiladi.

Reytingni yangilash natijalariga ko‘ra, “Scope 2” toifasidagi issiqxona gazlari tashlamalari haqidagi maʼlumotlarning ochiqlanishi, “Scope 1” va Scope 2” toifalari bo‘yicha 2030-yilga kelib chiqindilarni 10 foizga kamaytirish bo‘yicha maqsadli ko‘rsatkichlar belgilanganligi hamda ekologik ziddiyatli hodisalarning yo‘qligi tufayli “NKMK” AJning ekologik faoliyati ‘2’ darajasiga ko‘tarildi. Barqaror korporativ siyosatlarning mavjudligi, kadrlar bilan bog‘liq ishlash jarayonlarning barqarorligi hamda mehnat huquqlari va ijtimoiy masʼuliyat bilan bog‘liq bahsli holatlarning yo‘qligi bois ijtimoiy faoliyat ‘3’ darajasida tasdiqlandi. Korporativ boshqaruv faoliyati ‘2’ darajasida saqlab qolindi. Bu moliyaviy hisobotning yuqori sifati, xavf-xatarlar va soliq majburiyatlarini boshqarish tizimi hamda mehnatni muhofaza qilish va gender masalalarini takomillashtirish bo‘yicha tavsiyalarni ifoda etadi.

Shuningdek, “Sustainable Fitch” agentligi “NKMK” AJ tomonidan ESG-omillarning (materiality assessment) mavjudligini baholash o‘tkazilgani, hisobotlar GRI va SASB standartlariga muvofiq tayyorlangani hamda Kompaniya faoliyatining BMT Barqaror rivojlanish maqsadlariga muvofiqligini ijobiy baholadi.

“NKMK” AJ Boshqaruvi raisi – Bosh direktori Q.Sanaqulov taʼkidlaganidek:

“Barqaror rivojlanish tamoyillari samarali boshqaruv, investorlar ishonchini mustahkamlash va kompaniyaning uzoq muddatli barqarorligini ta’minlashning asosi hisoblanadi. ESG-reytingining tasdiqlangani ushbu sohadagi tizimli ishlarimizning natijalarini aks ettiradi. 2026-yilda “O‘zbekiston – 2030” milliy strategiyasi doirasida Kompaniyaning strategik maqsadlariga erishish va barcha manfaatdor tomonlar uchun uzoq muddatli qiymat yaratishni ta’minlash uchun reyting agentligi tavsiyalarini joriy etish va xalqaro ESG-standartlarini faoliyatning barcha yo‘nalishlariga doimiy ravishda tatbiq etishni davom ettiramiz.”

PRESS-RELIZ

“NKMK” AJ Matbuot xizmati