Navoiy kon-metallurgiya kombinatining gidrometallurgiya zavodlaridagi texnologik va ishlab chiqarish jarayonlar bevosita suv yordamida amalga oshirilishi tufayli korxonalarni suv bilan taʼminlashda “Amudaryo-Zarafshon” suv quvuri muhim ahamiyatga ega.

Amudaryo daryosi suvi mazkur suv quvurining nasos stansiyalari orqali Zarafshon va Uchquduq shaharlari aholisi va ishlab chiqarish obyektlari, kombinatning qator gidrometallurgiya zavodlariga Markaziy kon boshqarmasi Tashqi suv taʼminoti birlashgan energiya xizmati tomonidan yetkazib berilayapti. Bugungi kunda ushbu korxonada ming nafarga yaqin ishchi-xizmatchilar ishlab kelishmoqda.

- “Amudaryo-Zarafshon” suv quvurining uchinchi suv tarmog‘ini tortish va nasos stansiyalarini rekonstruksiya qilish” investitsion loyihasi bo‘yicha qurilish ishlari yakunlanib, obyekt to‘liq quvvatda foydalanishga topshirildi. Ushbu loyiha doirasida 158,9 kilometr uzunlikdagi metall quvurlar yotqizildi. Qurilish-montaj ishlari Zarafshon qurilish boshqarmasi tomonidan amalga oshirildi, - deydi MKB Tashqi suv taʼminoti birlashgan energiya xizmati boshlig‘i Mansurjon Qudratov.

Shuningdek, yuqorida qayd etilgan investitsion loyiha doirasida korxonada yillar davomida ishlab kelayotgan asbob-uskunalar va qurilmalar bosqichma-bosqich yangilanmoqda. Xususan, 7 ta nasos stansiyasida kengaytirish ishlari olib borilib, qo‘shimcha 12 ta nasos agregati o‘rnatildi. Korxonaning cho‘l hududida joylashgan nasos stansiyalari ham zamonaviy texnologiyalar bilan jihozlanib, ishchi-xodimlar uchun barcha shart-sharoitlar yaratildi. Jumladan, shinam oshxona, yotoqxona, maʼnaviyat xonasi hamda sport zallari tashkil etildi. Ishchi-xodimlar tomonidan turli sabzavotlar yetishtirilayotgan issiqxonalar barpo etildi.

Zarafshon shahridan uzoq cho‘l hududida joylashgan nasos stansiyalarda mehnat qilayotgan ishchi-xodimlar uchun ichimlik suvi yetkazib berishda muammollar mavjud edi. O‘tgan yilda har bir nasos stansiyasida suvni qayta tozalab, filtrlab beruvchi uskunalar o‘rnatilishi natijasida bu muammolar ham o‘z yechimini topdi. Hozirda ishchi-xodimlar toza ichimlik suvi bilan to‘liq taʼminlangan.

“NKMK” AJ Matbuot xizmati