Navoiy kon-metallurgiya kombinati hamda Navoiy davlat konchilik va texnologiyalar universiteti olimlari hamda mutaxassislari tomonidan olib borilgan qator ilmiy izlanishlar o‘zining samarasini bermoqda.

Markaziy ilmiy-tadqiqot laboratoriyasi tarkibida 2021-yilda “Suv taʼminoti muammolarini yechish” laboratoriyasi tashkil etilgani muhim ahamiyatga ega bo‘ldi. Laboratoriyaga keyingi yillarda 20 dan ortiq kimyoviy elementlarni aniqlashga mo‘ljallangan atom-absorbsion analizatori, eritma tarkibidagi loyqalik darajasini aniqlash mutnomer asbobi, spektrofotometr, elektron tarozi, kuydurish pechi, distillyator kabi uskunalar bilan taʼminlandi.

– Shuningdek, bugungi kunda kombinat gidrometallurgiya zavodlarining chiqindi saqlash xo‘jaligida texnik suvni tozalash va ularning ekologik qayta ishlash yo‘lida suv o‘tlaridan foydalanishni boshlashni rejalashtirdik. Tahlililar shuni ko‘rsatmoqdaki, azola, pistiya va exorniya kabi suv o‘tlari bo‘tanadagi zararli metallar va turli kimyoviy zaharli moddalarni o‘zlashtiradi. Shu bilan birga, kelgusida ushbu suv o‘tlarini quritib, ekin yerlariga o‘g‘it sifatida ham foydalanish mumukin, – deydi laboratoriya boshlig‘i Shavkat Salimov.

Mazkur laboratoriya tarkibida kimyoviy, spektral va radiologik tahlil hamda texnologik tadqiqotlar guruhlari ish olib boradi. Bugungi kunda 10 nafar soha mutaxassisi faoliyat yuritayotgan laboratoriyada gidrometallurgiya zavodlarida ishlatilayotan texnik suvning qariyb teng yarmini qayta tozalab, ishlab chiqarishga yo‘naltirishga asosiy eʼtiborni qaratmoqda. Bu esa suvdan maqsadli va oqilona foydalanishga yo‘l ochadi.

“NKMK” AJ Matbuot xizmati