IJTIMOIY MAS’ULIYAT

Prezidentimiz tashabbusi bilan amalga oshirilayotgan “Kambag‘allikdan farovonlik sari” dasturi kam taʼminlangan, ehtiyojmand oilalar va nogironligi bor insonlarning turmush darajasini oshirishga xizmat qilmoqda. Hozir joylarda bu borada moliyaviy-tashkiliy choralar ko‘rilib, tizim joriy qilingani ijobiy samarasini bermoqda.

Navoiy kon-metallurgiya kombinati tomonidan ijtimoiy himoyaga muhtoj oilalarni moddiy va maʼnaviy qo‘llab-quvvatlashga qaratilgan tadbirlarni amalga oshirish davom etmoqda. Kombinatdan biriktirilgan masʼullar Nurota, Uchquduq, Tomdi tumanlari va G‘ozg‘on shahrida aholi bandligini taʼminlash, oilalarning turmush farovonligini oshirish maqsadida bir qator manzilli loyihalarni amalga oshirishdi. Xususan, Nurota tumanining “Temirqovuq” mahalla fuqarolar yig‘ini aholisining ichimlik suvi taʼminoti yaxshilanib, 550 ta xonadonning obihayotga bo‘lgan ehtiyoji qondirilgani bunga yaqqol misol bo‘la oladi.

Joriy yilda kombinat homiyligida “Navoiy suv taʼminoti” AJ mutaxassislari tomonidan qishloq yuqorisidagi darada uchta kaptaj buloqlari yangilandi, transheyalar kovlanib, 500 metrdan ortiq polietilen suv quvurlari tortildi. Kaptajda yig‘ilgan suv o‘z oqimi bilan sig‘imi 1 000 kubmetr bo‘lgan maxsus rezervuarga kelib to‘planadi, so‘ngra quvurlar orqali isteʼmolchilarga yetkaziladi.

- Suv taʼminoti uzoq yillardan buyon odamlarni o‘ylantirib kelayotgan edi. Prezidentimizga rahmat, bu muammo hal etildi. “Navoiy kon-metallurgiya kombinati” aksiyadorlik jamiyati bu muammoni hal qilishda amaliy ko‘mak ko‘rsatdi. Korxona yordamida Temirqovuq darasidan qo‘shimcha quduqlar qazilgani va quvur yotqizilib, suv keltirilganidan odamlarimiz juda xursand, - deydi mehnat faxriysi Esonboy To‘ychiyev.

“NKMK” AJ Matbuot xizmati