Navoiy mashinasozlik zavodi tarkibidagi Termiz mexanika zavodi mahalliylashtirilgan va import o‘rnini bosuvchi mahsulotlar ishlab chiqarishga mo‘ljallangan korxona hisoblanadi. 2016-yilda o‘z faoliyatini boshlagan korxonada o‘tgan davr mobaynida 300 dan ortiq mahsulot turlarini ishlab chiqarish yo‘lga qo‘yildi.

Bugungi kunda ushbu zavodda har xil metall konstruksiyalar, idishlar, ehtiyot qismlar ishlab chiqarish, taʼmirlash, payvandlash va boshqa o‘nlab yo‘nalishda ishlar olib borilmoqda. Ellik nafardan ortiq ishchi-xodimdan iborat zavod jamoasi nafaqat Navoiy kon-metallurgiya kombinati, balki Surxondaryo viloyatidagi “Sherobod sement zavodi”, “Surxondaryo hududgaz” MChJ, “Surxonsementinvest” XK va boshqa korxonalarga ham shartnoma asosida xizmat ko‘rsatmoqda.

- Hozirgi vaqtda zavodimizda yettita uchastka mavjud bo‘lib, ish ikki smenada tashkil etilgan. Jamoamiz asosan tajribali mutaxassislar, mahalliy yoshlardan tashkil topgan. Ularning saʼy-harakatlari bilan rejalar o‘z vaqtida bajarilishiga erishilmoqda. Joriy yilda 25 mlrd. so‘mdan ortiq mahsulot ishlab chiqarishni rejalashtirganmiz. Har yili o‘rtacha 500 tonnadan ziyod tayyor mahsulotlar ishlab chiqarilmoqda, - deydi zavod bosh muhandisi Olim Dusyarov.

Jamoada tajribali mutaxassislar ko‘pchilikni tashkil etadi. Olimjon Mingliyev, Islom Kamolov, Nurqobil Haydarov, Baxtiyor Turobov, Muhriddin Omonov, Bahodir Ro‘zimuratov, Botir Imomov, Sunatillo Mirzaqulov va Sharofiddin Tursunovlar shular jumlasidandir.

“NKMK” AJ Matbuot xizmati