Bugungi kunda Navoiy kon-metallurgiya kombinati korxonalarida ishlab chiqarish jarayonlariga zamonaviy raqamli texnologiyalarni joriy etish bo‘yicha keng ko‘lamli ishlar amalga oshirilmoqda.

Xususan, Shimoliy kon boshqarmasida konchilik texnikalariga xizmat ko‘rsatish va taʼmirlash ishlarini boshqarishni raqamlashtirish uchun Axborot-kommunikatsiya texnologiyalari boshqarmasi mutaxassislari tomonidan “1С:TOiR” (Texnik xizmat ko‘rsatish va taʼmirlash) axborot tizimi joriy etildi.

Mazkur tizimni joriy etishdan asosiy maqsad – texnik xizmat va taʼmirlash jarayonlarini rejalashtirish, bajarish va nazorat qilishni avtomatlashtirish orqali konchilik texnikalaridan foydalanish xarajatlarini kamaytirishdir. Hozirda tizim orqali 100 dan ortiq avtoag‘dargich, ekskavator va burg‘ulash uskunalari qamrab olingan.

Ushbu axborot tizimning muhim afzalliklaridan biri – mobil ilova orqali texnik ko‘rik natijalarini real vaqtda yuborish, avtomatik ravishda yoki dispetcher nazorati ostida taʼmirlash buyurtmalarini shakllantirishdir. Shu orqali qog‘ozbozlik kamayib, taʼmirlash ishlari vaqtida va sifatli bajarilishi taʼminlanmoqda.

Hozirgi vaqtda axborot tizimining server va infratuzilmasi to‘liq ishga tushirilgan bo‘lib, taʼmirlash bo‘yicha barcha ichki hujjatlar, hisobotlar va texnik hujjatlar tizim orqali shakllantirilmoqda.

Bu kabi raqamlashtirish ishlari nafaqat samaradorlikni oshirmoqda, balki mehnatni muhofaza qilish, xavfsizlik, resurslarni tejash va ish muhitini yaxshilashga ham xizmat qilmoqda.

“NKMK” AJ Matbuot xizmati