15-dekabr kuni Toshkent shahridagi “O‘zekspomarkaz”da Respublika tarmoqlararo sanoat yarmarkasi o‘z ishini boshladi. Mamlakatimizning yirik sanoat korxonalari va mahalliy ishlab chiqaruvchilar o‘rtasida tarmoqlararo sanoat kooperatsiyasi aloqalarini yanada kengaytirish maqsadida tashkil etilgan mazkur yarmarka 19-dekabr kuniga qadar davom etadi.

Yarmarka doirasida ko‘plab yirik tarmoq korxonalari hamda mahalliy ishlab chiqaruvchi korhonalar tomonidan mahsulotlar ko‘rgazmasi namoyish etilmoqda. Ko‘rgazma pavilyonlaridan kon-metallurgiya va kimyo, neftgaz, energetika va elektrotexnika, transport, telekommunikatsiya, farmatsevtika, qurilish materiallari va mebel, to‘qimachilik va charm sanoati mahsulotlari joy olgan.

“Navoiy kon-metallurgiya kombinati” AJ mazkur yarmarkada Tog‘-kon sanoati va geologiya vazirligi tarkibidagi tarmoq korxonalarining yagona stendi doirasida ishtirok etib, kombinat ehtiyojlari uchun importdan olib kelinayotgan hamda korxonada mahalliylashtirilgan 100 dan ziyod mahsulot namunalari va ularning maketlarini namoyish etmoqda.

Kombinat mutaxassislari tomonidan yarmarkada ishtirok etayotgan hamda kombinat ehtiyojlari uchun mahsulot yetkazib berishni maqsad qilgan mahalliy tadbirkorlik subyektlariga mahsulotning sifat va talab darajalari bo‘yicha maʼlumotlar berilmoqda. Yarmarka doirasida mahalliy ishlab chiqaruvchi korxonalar bilan bir qator hamkorlik shartnomalari imzolanishi rejalashtirilgan.

“NKMK” AJ Matbuot xizmati.