Navoiy kon-metallurgiya kombinatining mineral resurs bazasini tashkil etadigan oltin konlarning aksariyati Qizilqum sahrosi kengliklarida joylashgan. Tomdi tumanidagi “Turbay” koni Markaziy kon boshqarmasi tarkibiga kiradigan istiqbolli konlardan biridir.

Mazkur konni o‘zlashtirish ishlari investitsion loyiha asosida 2022-yilda boshlangan edi. Loyiha doirasida konda yiliga 2 mln. tonnadan ortiq oltin tarkibli maʼdan qazib olinmoqda. Xususan, 2023-yilda 2,3 mln. tonna maʼdan qazib olingan bo‘lsa, 2024-yilning o‘tgan o‘n oyida esa bu ko‘rsatkich 2,6 mln. tonnani tashkil etdi.

“Turbay” koni boshlig‘i Ilhomjon Xudaynazarov maʼlum qilganidek:

“Bugungi kunda konda 350 nafardan ortiq ishchi-xodim mehnat qilmoqda. Kondan qazib chiqarilgan maʼdan 50 kilometrlik temir yo‘l orqali 5-gidrometallurgiya zavodiga qayta ishlash uchun tashib keltirilmoqda. “Turbay konining bosqichma-bosqich o‘zlashtirilishi natijasida uzunligi 1,5 kilometr, kengligi 1 kilometr, chuqurligi qariyb 200 metrga teng bo‘ladigan karyer shakllanadi.”

Maʼdan qazib olish hajmini oshirish maqsadida investitsion loyihalar asosida konga zamonaviy og‘ir yuk tashuvchi avtoag‘dargichlar va tog‘-kon texnikalari keltirilmoqda. Bugungi kunda konda “Hitachi” va “Liebherr” rusumli gidravlik ekskovatorlar, “Sandvik” va “Epiroc” rusumli burg‘ulash uskunalari, “Komatsu” va “Catarpillar” rusumli avtoag‘dargichlar va turli yordamchi texnikalardan keng foydalanilmoqda.

O‘tgan vaqt mobaynida korxona ishchi-xodimlari uchun qulayliklar va munosib mehnat sharoitlarini yaratish maqsadida kon hududida vaxta usulida ishlaydigan ishchilar uchun 300 o‘rinli yotoqxona, 90 o‘rinli oshxona barpo etildi. Shuningdek, elektr energiya sarfini kamaytirishda muhim o‘rin tutadigan qayta tiklanuvchi energiya manbalaridan foydalanish uchun kon hududida quvvati 1 MW bo‘lgan quyosh fotoelektr stansiyasini qurish ishlari olib borilmoqda.

Xulosa o‘rnida aytish kerakki, “Turbay” konini o‘zlashtirish bo‘yicha amalga oshirilayotgan ishlar Navoiy kon-metallurgiya kombinatida qimmatbaho metallarni ishlab chiqarish hajmini oshirishga xizmat qilmoqda.

“NKMK” AJ Matbuot xizmati