“Turbay” koni Navoiy kon-metallurgiya kombinatining Shimoliy kon boshqarmasi tarkibidagi istiqbolli konlardan biridir.

“Turbay” konini o‘zlashtirish ishlari investitsion loyiha asosida 2022-yilda boshlangan bo‘lib, bugungi kunga qadar qariyb 18 mln. kubometr tog‘ jinslari qazib olindi. 2025-yilning birinchi yarim yillligida kondan 1,2 mln. tonnaga yaqin oltin tarkibli maʼdan temir yo‘l orqali 5-gidrometallurgiya zavodiga qayta ishlash uchun yetkazildi.

- Bugungi kunda “Turbay” konida murakkab kon-geologik tuzilishga ega maʼdanlarni qazib olish ishlari olib borilmoqda. Maʼdan tarkibidagi qimmatbaho metall o‘zgaruvchan bo‘lib, bu burg‘ulash ishlarida o‘ziga xos yondashuvni talab etadi. Konning bosqichma-bosqich o‘zlashtirilishi natijasida hozirgi vaqtda karyer uzunligi 750 metr, kengligi 1 300 metrdan ortiq, chuqurligi qaryib 100 metrni tashkil etadi, - deydi kon boshlig‘i Nabi Ochilov.

Konda maʼdan qazib olish hajmini oshirishda “Sandvik” va “Epiroc” rusumli burg‘ulash uskunalari, “Hitachi” va “Liebherr” rusumli gidravlik ekskovatorlar, “Komatsu” va “Catarpillar” rusumli avtoag‘dargichlar hamda boshqa zamonaviy konchilik texnikalaridan keng foydalanilmoqda.

“Turbay” konini o‘zlashtirish bo‘yicha amalga oshirilayotgan ishlar Navoiy kon-metallurgiya kombinatida qimmatbaho metallarni ishlab chiqarish hajmini oshirishda muhim ahamiyatga ega.

“NKMK” AJ Matbuot xizmati