5-8-fevral kunlari Qiziltepa tumanidagi “To‘dako‘l” dam olish maskanida joylashgan Xalqaro shaxmat maktabida NKMK yoshlar yetakchilari Kengashi va kasaba uyushmasi Kengashi hamkorligida kombinatda jamoatchilik asosida faoliyat yuritayotgan boshlang‘ich tashkilot yetakchilari uchun o‘quv-amaliy seminar o‘tkazildi.

Mazkur o‘quv-amaliy seminar doirasida yetakchilarning liderlik qobiliyatlarini rivojlantirish, yoshlar bilan ishlash ko‘nikmalarini oshirish, bir-biri bilan tajriba almashishga qaratilgan treninglar, maʼnaviy-maʼrifiy va sport tadbirlari tashkil etildi. Tadbirning birinchi kunida “Seminarda bir kitob” loyihasi doirasida kitobxonlik tanlovi hamda yoshlar jamoalari o‘rtasida “Zakovat“ intellektual o‘yini o‘tkazildi.

Tadbirning ikkinchi kunida Toshkent xalqaro universiteti dotsenti, psixologiya fanlari bo‘yicha falsafa doktori Nargiza Norqulova tomonidan yoshlarda ichki motivatsiyani shakllantirish, yetakchilik salohiyatini rivojlantirish hamda samarali muloqot ko‘nikmalarini oshirish va boshqa mavzularda seminar-treninglar olib borildi.

Tadbirning uchinchi kunida mazkur seminarning ochilish marosimi bo‘lib o‘tdi. Tadbirda “NKMK” AJ Jamoatchilik bilan aloqalar bo‘yicha direktor X.Raupov ishtirok etib, “Prezidentimizning Oliy Majlis va xalqimizga yo‘llagan Murojaatnomasining ahamiyati” mavzusida fikr-mulohazalarini bildirdi. Jumladan, mazkur Murojaatnomada belgilangan ustuvor yo‘nalishlar, yoshlar oldidagi vazifalar hamda mamlakat taraqqiyotida faol ishtirok etish masalalariga alohida e’tibor qaratildi. Shuningdek, “NKMK” AJ Tashkiliy rivojlanish bo‘limi bosh mutaxassisi M.Mirzajanov tomonidan “Shaxsiy samaradorlik va jamoa bilan ishlash” mavzusida trening o‘tkazildi.

Mazkur seminarning to‘rtinchi kunida “Yilning eng yaxshi yetakchisi” tanlovi g‘oliblari hamda faol yoshlar yetakchilari diplomlar bilan taqdirlandi.

“NKMK” AJ Matbuot xizmati