Navoiy kon-metallurgiya kombinatida transport sohasini rivojlantirishga alohida eʼtibor qaratilmoqda. So‘nggi yillarda og‘ir yuk tashuvchi avtoag‘dargichlar va tog‘-kon texnikalari tarkibi muntazam yangilanib borilayapti.

2024-yilda kombinatda amalga oshirilayotgan investitsion loyihalar doirasida yuk ko‘tarish quvvati 55 tonnadan 254 tonnagacha bo‘lgan “Komatsu”, “Caterpillar” rusumli zamonaviy avtoag‘dargichlar keltirilmoqda. Xususan, Shimoliy kon boshqarmasining Avtomobil transporti boshqarmasida mavjud ishlab chiqarish quvvatlari barqarorligini taʼminlash maqsadida joriy yilda yuk ko‘tarish quvvati 90 tonna bo‘lgan qariyb 20 ta yangi “Komatsu” va “Caterpillar” rusumli avtoag‘dargichlardan foydalanilmoqda.

ShKB Avtomobil transport boshqarmasi boshlig‘i Sanjar Tog‘ayev maʼlum qilishicha:

“Korxonamiz avtotransport parki yangilanishi natijasida joriy yilning o‘tgan davrida kunlik tashilgan kon massasi hajmi 2023-yilga nisbatan 17 foizga oshdi. Shu yil yakuniga qadar kon massasini tashishni 70 mln. kubometrga yetkazish hamda yoqilg‘i-moylash materiallari va ehtiyot qismlarini tejash hisobidan tannarxni pasaytirish bo‘yicha iqtisodiy samaradorlikka erishish rejalashtirilgan.”

Shuningdek, Avtomobil transport boshqarmasidagi avtotransport vositalari uchun zarur import ehtiyot qismlarni kombinat va Shimoliy kon boshqarmasi bo‘linmalari hamda maxalliy ishlab chiqaruvchi korxonalarda tamirlash va tayyorlash yo‘lga qo‘yilgan. Misol uchun joriy yilda turli rusumdagi elektrodvigatellar, sinxron tortish generatorlari Navoiy mashinasozlik zavodi, kon boshqarmasining Elektr jihozlarini taʼmirlash uchastkasi hamda “Navoiyelektroremont” va “Elmash” MChJlarda taʼmirlandi.

Taʼkidlash kerakki, kombinat korxonalarida konchilik ishlarini amalga oshirishda zamonaviy avtotransport vositalaridan foydalanish yuqori ish unumdorligini taʼminlashga xizmat qilmoqda.

“NKMK” AJ Matbuot xizmati.