Joriy yilda Navoiy kon-metallurgiya kombinati tomonidan mamlakatimiz mustaqilligining dastlabki yillarida barpo etilgan 3-gidrometallurgiya zavodi foydalanishga topshirilganiga 30 yil to‘ladi. So‘nggi yillarda korxonada ilg‘or texnologiyalarni joriy etish, ishlab chiqarish samaradorligini oshirish va barqaror rivojlanishni taʼminlash bo‘yicha keng ko‘lamli ishlar amalga oshirildi.

“NKMK” AJ mutaxassislari va olimlari tomonidan olib borilgan 3 000 dan ortiq ilmiy-tadqiqot va tajriba-konstruktorlik ishlari natijasida zavodda “Qoqpatas” va “Dovg‘iztov” konlarining murakkab tarkibli maʼdanlardan oltinni ajratib olish texnologiyasini takomillashtirish bo‘yicha yirik investitsiya loyihasi amalga oshirildi.

Natijada, 2019-yilda 3-GMZda ilgari chiqindi deb hisoblangan materiallar – sorbsiya jarayoni chiqindilarini qayta ishlash uchun mo‘ljallangan ishlab chiqarish majmuasi – Filtrlash, quritish va kuydirish sexi ishga tushirildi. Mazkur texnologiya chiqindilardan katta miqdordagi oltinni qo‘shimcha ajratib olish imkonini berib, tabiiy resurslardan foydalanish samaradorligini sezilarli darajada oshirmoqda. Ushbu ishlanmaga patent olingan bo‘lib, kombinat mutaxassislari va olimlari Birlashgan Millatlar Tashkilotining Butunjahon intellektual mulk tashkilotining oltin medaliga sazovor bo‘ldi hamda ilmiy-amaliy ishlanmasi uchun fan va texnika sohasida birinchi darajali Davlat mukofoti bilan taqdirlandi.

Ushbu majmua nafaqat yuqori samaradorlikka ega, balki energiya tejamkor hamdir. Unda issiqlikni utilizatsiya qilish bo‘yicha yangi texnologiyalar qo‘llanilgan bo‘lib, sintez hisobiga tabiiy gaz sarfi kamaytirilgan, energiya yo‘qotilishini kamaytirish uchun maxsus moslamalar joriy etilgan. Filtrlash va quritishdan tortib, gazni kuydirish va tozalashgacha bo‘lgan barcha ishlab chiqarish jarayonlari to‘liq avtomatlashtirilgan, butun tizim operatorlik markazidan boshqariladi.

- Ekologik xavfsizlikni taʼminlash – ustuvor vazifamiz. Sexda o‘rnatilgan chiqindi gazlarni ko‘p bosqichli tozalash tizimi zararli moddalarni, shu jumladan oltingugurt angidridini 99,99 foizgacha ushlab qolmoqda. Atmosferaga deyarli toza suv bug‘i chiqmoqda va biz yuqori mahsuldorlikni atrof-muhitga nisbatan masʼuliyatli munosabat bilan birlashtira olganimizdan faxrlanamiz, - deydi 3-GMZ ishlab chiqarish-texnik bo‘limi boshlig‘i Alisher Usmonov.

Joriy etilgan texnologiyalar tufayli zavodda oltin ajratib olishning umumiy darajasi 15 foizdan oshdi, chiqindilardan esa yiliga qo‘shimcha 1,5 tonnadan ortiq oltin ajratib olinmoqda.

Hozirgi vaqtda ushbu loyihaning yangi texnik-iqtisodiy asosiga muvofiq filtrlash, quritish va kuydirish majmuasini kengaytirish rejalashtirilgan bo‘lib, to‘rtinchi filtr-press va uchinchi quritish barabani qurilmoqda, bu ishlar joriy yilda yakunlanishi ko‘zda tutilgan. Shuningdek, kuydirish pechining unumdorligini oshirish bo‘yicha ham ishlar olib borilmoqda.

“NKMK” AJ Matbuot xizmati