Aziz hamkasblar, qadrli mehnat faxriylari, muhtarama opa-singillar va fidoyi yoshlar!

Sizlarni, shuningdek sizlar orqali oila a’zolaringizni kirib kelayotgan yangi – 2026-yil bilan chin qalbdan samimiy tabriklayman.

O‘tib borayotgan yil korxonamiz uchun barakali, mazmunli va yutuqlarga boy bo‘ldi. Mehnat faxriylarining boy tajribasi, yoshlarning shijoati jamoamizda uzviy uyg‘unlikni ta’minlab, korxona taraqqiyotiga mustahkam zamin yaratmoqda. Ana shu birdamlik va o‘zaro hamjihatlik yutuqlarimizga mustahkam poydevor bo‘lib xizmat qilmoqda.

Yana bir yil o‘z poyoniga yetmoqda. Bu yil tarix sahifalarida jonajon Vatanimiz taraqqiyotida muhim bosqich sifatida muhrlandi. Muhtaram Prezidentimiz Shavkat Mirziyoyev rahnamoligida olib borilayotgan keng ko‘lamli islohotlar hamda mehnatkash xalqimizning fidokorona mehnati, siyosiy-ijtimoiy faolligi tufayli Yangi O‘zbekiston g‘oyasi real voqelikka aylanmoqda.

2025-yilni kombinatimiz jamoasi barcha sohalarda barqaror va yuksak natijalar bilan yakunlamoqda. Ishlab chiqarish jarayonlarida zamonaviy texnologiyalarni joriy etish, mehnat unumdorligini oshirish va mahsulot sifatini yaxshilash borasida olib borilayotgan izchil ishlar tufayli salmoqli yutuqlar qo‘lga kiritilmoqda.

Joriy yil yakunlariga ko‘ra kombinatimizda 134 trillion so‘mlik sanoat mahsulotlari ishlab chiqarilib, o‘sish sur’ati o‘tgan yilga nisbatan 102,1 foizni tashkil qildi. Oltin ishlab chiqarish 100,1 foizga, kumush ishlab chiqarish 100,5 foizga bajarildi.

Mahalliylashtirish dasturi asosida joriy yilda 1,4 trillion so‘mlik mahsulotlar ishlab chiqarildi. Navoiy mashinasozlik zavodida 11 dona tegirmon ishlab chiqarilib, zavodlarimizga yetkazib berilgani nafaqat korxonamiz, balki mamlakatimiz og‘ir sanoatida ham muhim voqea bo‘ldi.

Janubiy va “Qizilqum” kon boshqarmalari, 3, 4, 6, 7-gidrometallurgiya zavodlari, Marjonbuloq oltin ajratish va “Auminzo-Amantoy” koni uyumda eritmaga o‘tkazish sexlari jamoalari birinchilardan bo‘lib mahsulot ishlab chiqarish bo‘yicha belgilangan yillik rejalarni muddatidan oldin bajarib, yuksak jasorat va fidoyilik namunasini ko‘rsatdilar.

Joriy yilda jamoamizning sa’y-harakatlari bilan qator ishlab chiqarish obyektlari ishga tushirildi. Jumladan. “Qoqpatas va Dovg‘iztov oltin konlarida ma’dan qazib olish (III navbati)” investitsion loyihasi doirasida 3-gidrometallurgiya zavodi Biooksidlash sexida 9, 10-biooksidlash modullari, “Dovg‘iztov” konida esa uzunligi 1900 metr bo‘lgan Davriy oqim texnologiyasi majmuasi ishga tushirildi.

“Zarmitan” konida zamonaviy muhandislik inshooti – “Skipli” stvol ishga tushirildi. Ushbu shaxtaning chuqurligi 1 000 metrni tashkil etib, Markaziy Osiyoda yagona hisoblanadi.

Joriy yilda 1-gidrometallurgiya zavodida og‘irligi 105 tonna bo‘lgan “MShS 32х31” rusumli sharli tegirmonni almashtirish ishlari qisqa fursatda, aniqrog‘i 48 soatda muvaffaqiyatli amalga oshirildi. Bu yutuq muhandis va mutaxassislarimizning salohiyati, hamjihatligi va ishga to‘g‘ri yondashuvi natijasida bo‘ldi.

O‘tayotgan yilda korxonamiz xalqaro miqyosda muhim e’tiroflarga munosib ko‘rildi. “Sustainable Fitch” xalqaro reyting agentligi tomonidan fevral oyida korxonamizga ilk bor korporativ ESG-reytingi berildi. ESG-reytingini berish uchun agentlik kombinatning barqaror rivojlanish strategiyasi va tashabbuslari, kompaniyaning korporativ boshqaruv amaliyotlari hamda uning ijtimoiy va ekologik ta’sirini ijobiy baholadi. Iyul oyida “Fitch Ratings” xalqaro reyting agentligi “NKMK” AJning uzoq muddatli kredit reytingini (IDR) “Barqaror” prognozi bilan “BB” darajasigacha oshirdi. “S&P Global Ratings” xalqaro reyting agentligi “Navoiy kon-metallurgiya kombinati” AJning uzoq muddatli kredit reytingini “Barqaror” prognozi bilan “BB” darajasigacha oshirdi.

O‘zbekiston Respublikasi Korrupsiyaga qarshi kurashish agentligi tomonidan 2024-yil yakuni bo‘yicha e’lon qilingan davlat idoralari va tashkilotlarining korrupsiyaga qarshi kurashishdagi ishlari samaradorligi reyting baholash natijalariga ko‘ra, “NKMK” AJ 96 ball bilan respublikada faxrli 1-o‘rinni egallab, korrupsiyaga qarshi kurashish bo‘yicha eng yuqori natijani qayd etdi. Shuningdek, davlat organlari va tashkilotlarida ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi”da “NKMK” AJ 89.2 ball bilan ketma-ket uchinchi yil eng yuqori samaradorlik ko‘rsatkichlaridan birini qayd etdi.

Mamlakatimizda Prezidentimiz tashabbuslari bilan ilgari surilgan “Yashil makon” umummilliy loyihasi doirasida kombinatimiz jamoasi tomonidan 2025-yil davomida yirik sanoat korxonalari va chiqindi poligonlari atrofiga, shuningdek magistral yo‘l bo‘yiga 443 ming dona manzarali va mevali daraxt hamda buta ko‘chatlari ekilib, “Yashil belbog‘”lar tashkil qilindi. 2025-yil Navoiy viloyatida “Alisher Navoiy yili”, deb e’lon qilinganligi munosabati bilan Nurota tumanidagi “Pistali” koni hududida “Yashil makon” umummilliy loyihasi doirasida 165 gektar maydonda Alisher Navoiy bog‘i barpo etildi.

Kombinat ma’muriyati va kasaba uyushmalari Kengashi bilan ishchi-xodimlarimizni ijtimoiy jihatdan qo‘llab-quvvatlashga ham e’tibor qaratdik. Ishchi-xodimlarimiz uchun zamonaviy talablarga javob beradigan 6 ta sihatgoh va dam olish maskani, 11 ta bolalar oromgohi, 5 ta tibbiyot muassasasi, shuningdek 6 ta madaniyat va sport maskanlari faoliyat yuritmoqda.

Yakunlanayotgan yil jamoamiz uchun quvonchli va unutilmas sanalarga boy bo‘ldi. Zarafshon qurilish boshqarmasi tashkil topganining 60 yilligi hamda 3-gidrometallurgiya zavodining 30 yilligi ko‘tarinki ruhda nishonlandi.

Yangi O‘zbekiston taraqqiyotiga munosib hissa qo‘shishni o‘z oldiga maqsad qilib olgan kombinatimizning barcha ishchi-xodimlari kecha-yu kunduz fidoyilik va yuksak mas’uliyat bilan mehnat qilishayotganligi tahsinga loyiqdir. Kombinatda amalga oshirilayotgan investitsion dasturlar mamlakat iqtisodiy salohiyatini oshirish, Yangi O‘zbekiston taraqqiyotini jadallashtirishda muhim omil bo‘lib xizmat qiladi.

Aziz hamkasblar!

Xalqimiz har bir ish oldidan duoga qo‘l ochib, yaxshi niyatlar qiladi. Zero, har qanday xayrli ish yaxshi niyatlardan boshlanadi. Ilohim, Yaratganning o‘zi kelayotgan yilda ham ishimizga rivoj berib, yuzimizni yorug‘ qilsin!

Fursatdan foydalanib, Yangi yilda barchangizga mustahkam sog‘liq, xonadonlaringizga tinchlik-osoyishtalik, oilalaringizga baraka, ishlaringizga omad va yanada katta zafarlar tilayman.

Yangi yil barchamizga muborak bo‘lsin!

Quvondiq SANAQULOV,

“NKMK” AJ Boshqaruvi raisi – Bosh direktori