Bugungi kunda Navoiy kon-metallurgiya kombinati bo‘linmalarida qayta tiklanuvchi energiya manbalarini joriy etish, ulardan keng foydalanishga alohida eʼtibor qaratib kelinmoqda.

Markaziy kon boshqarmasiga qarashli Tashqi suv taʼminoti birlashgan energiya xizmatida o‘tgan yildan eʼtiboran ishlab chiqarish maydonlariga suv yetkazib berish va issiqlik energiyasi bilan taʼminlashda quyosh fotoelektr stansiyalari qo‘llanilmoqda. Xususan, korxonaning Tuproqqalʼa va Peshku tumanlarida joylashgan 1 va 2-nasos stansiyalari, Uchquduq tumanida joylashgan 3 va 4-nasos stansiyalarida bugungi kunda jami 700 kW quvvatli quyosh fotoelektr stansiyalari ishlab kelmoqda.

- Tashqi suv taʼminoti birlashgan energiya xizmati sanoat maydonlarida quyosh fotoelektr stansiyalari va geliokollektorlardan keng foydalanilmoqda. Korxonada o‘rnatilgan quyosh fotoelektr stansiyalarida yiliga 928 ming kW.h. elektr energiyasi ishlab chiqarilayapti. Ushbu energiya maʼmuriy binolar ehtiyojini to‘liq taʼminlayapti, - deydi Markaziy kon boshqarmasi bosh energetigi o‘rinbosari Asqar Jo‘libekov.

Mazkur quyosh foto elektrostansiyalari ishlab chiqarayotgan elektr energiyasini hisobga olish va nazorat qilishning avtomatlashtirilgan hisoblagichlari o‘rnatilgan. Korxonada “yashil” energetikani keng joriy etish elektr energiyasini tejashdan tashqari, ishlab chiqarilayotgan mahsulot tannarxini kamaytirishda ham muhim omil bo‘lmoqda.

“NKMK” AJ Matbuot xizmati