Navoiy kon-metallurgiya kombinati bugun geologiya, konchilik, metallurgiya, energetika, mahalliylashtirish, transport, qurilish kabi yirik sohalarni mujassam etgan koʻp tarmoqli strategik ishlab chiqarish klasteri. Mazkur tarmoqlarning har biri boʻyicha keng qamrovli ishlar, loyihalar, dasturlar amalga oshirilmoqda. Bu esa kombinatni rivojlantirish, kelgusi istiqbolini belgilashda alohida ahamiyatga ega.

Bugungi kunda har bir korxona uchun “yashil” iqtisodiyotning muhim komponenti sifatida qayta tiklanadigan energiya manbalaridan foydalanish muhim ahamiyat kasb etadi. O‘zbekiston Respublikasi Prezidentining 2023-yil 16-fevraldagi “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida”gi qarori ijrosi yuzasidan kombinat ishlab chiqarish obyektlarida 2024-yilga qadar ishga tushirilgan quyosh fotoelektr stansiyalarining umumiy quvvati 1 450 kW ni tashkil etgan edi. Oʻtgan yil oxiriga kelib, qoʻshimcha 5 800 kW quyosh fotoelektr stansiyalari ishga tushirildi va ularning quvvati 5 barobar oshdi.

Bugun kombinatning barcha maʼmuriy binosi fotoelektr stansiyalaridan olinadigan elektr energiyasi bilan toʻliq taʼminlanmoqda. Ayni paytda Nurota tumanidagi “Pistali” koni maydonida umumiy quvvati 2 300 kW dan ortiq fotoelektr stansiyasining qurilish-montaj ishlari yakuniga yetkazilmoqda. U birinchi chorak oxirida ishga tushadi va kombinat fotoelektr stansiyalarining quvvati 9 550 kW ga yetadi. Natijada fotoelektr stansiyalaridan yiliga 17,5 mln. kW.h. elektr energiyasi ishlab chiqariladi. Hozirda kombinat elektr energiyasi isteʼmolining qariyb 12,6 foizi Tomdi tumanida, NKMK ishlab chiqarish obyektlari yaqinida foydalanishga topshirilgan 500 MW quvvatga ega shamol elektr stansiyasida ishlab chiqarilayotgan elektr energiyasi hisobidan qoplanmoqda. “Yashil” energetikadan foydalanish ulushini yil sayin oshirib borish kombinatning xalqaro reytingdagi oʻrnini koʻtarish hamda xorijiy investorlarni jalb qilish imkoniyatini yaratadi.

O‘zbekiston Respublikasi Prezidenti Shavkat Mirziyoyevning 2024-yil noyabrida Navoiy viloyatiga tashrifi chogʻida 15 dan ortiq loyiha, jumladan, Tomdi tumanidagi 500 MW quvvatli fotoelektr stansiyasi qurilishi loyihasiga start berildi. Ushbu fotoelektr stansiyasi ishga tushirilgandan soʻng yiliga 1 mlrd. kW.h. elektr energiyasi ishlab chiqarish imkoni vujudga keladi. Bu esa kombinatning yillik elektr energiyasi isteʼmolining 21 foizini tashkil qiladi.

Kombinat obyektlarida 4 993 ta quyosh suv isitish qurilmasi oʻrnatilgan. Ular yordamida bir kunda qariyb 724 ming litr hajmda issiq suv ishlab chiqarilmoqda. Mavsum (aprel-oktabr oylari)da kombinatning barcha obyektida issiq suvga ehtiyojni 100 foiz quyosh suv isitish qurilmalari hisobidan qoplashga erishildi. Natijada quyosh suv isitish qurilmalaridan foydalanish evaziga yiliga 1,7 mln. kubmetr tabiiy gaz yoki elektr energiyasi ekvivalentida 12,3 mln. kW.h. elektr energiyasi tejab qolindi.

Prezidentimiz tomonidan 2025-yilning Atrof-muhitni asrash va “yashil” iqtisodiyot yili, deb eʼlon qilinishi bu sohadagi ishlarni yangi bosqichga olib chiqishiga xizmat qiladi.

“NKMK” AJ Matbuot xizmati.