Navoiy kon-metallurgiya kombinatida yuk tashish, ishchi-xodimlarni manzillarga olib borish va olib kelish hamda konlardan qazib olinadigan maʼdanlarni gidrometallurgiya zavodlariga yetkazishda avtomobil transportidan keng foydalaniladi.

Bu ishlarni bajarishga kombinatning eng yirik avtokorxonasi – Markaziy kon boshqarmasi tarkibidagi Avtomobil transporti boshqarmasi katta hissa qo‘shib kelmoqda. Mazkur boshqarmada ayni paytda 2,5 ming nafardan ortiq ishchi-xodimlar, haydovchilar mehnat qilmoqda.

So‘nggi yillarda avtokorxonada og‘ir yuk tashuvchi avtoag‘dargichlar va konchilik texnikalari muntazam yangilanib borilmoqda. Buning hisobiga tog‘ jinslarini tashish hajmi yildan-yilga ortib borayapti. Xususan, 2024-yilda Avtomobil transporti boshqarmasi tomonidan “Muruntov” konidan 118 mln. kubometr tog‘ jinslari tashilgan bo‘lsa, joriy yilda esa bu ko‘rsatkich qariyb 138 mln. kubometrni tashkil etishi rejalashtirilgan.

- Hozirgi vaqtda korxonamizda 350 dan ortiq transport vositalari, shu jumladan, yuk ko‘tarish quvvati 90 tonnadan 260 tonnagacha bo‘lgan turli rusmdagi avtoag‘dargichlar mavjud. Avtotransport parki asosan “Komatsu” va “Caterpillar” rusumli zamonaviy avtoag‘dargichlardan iborat, chunki ular har jihatdan qulay, unumdor va tejamkor. Joriy yilda 30 dan ortiq texnikalar, xususan, “Hitachi” rusumli yangi avtoag‘dargichlar keltirilishi rejalashtirilgan, - deydi ATB boshqarma boshlig‘i Shuhrat Mavlonov.

Taʼkidlash kerakki, kombinat korxonalarida konchilik ishlarini amalga oshirishda zamonaviy avtotransport vositalaridan foydalanish yuqori ish unumdorligini taʼminlashga xizmat qilmoqda.

“NKMK” AJ Matbuot xizmati.