O‘zbekiston Respublikasi davlat mustaqilligining 34 yilligi arafasida Qo‘shrabot tumanidagi Zarkent qo‘rg‘onida Navoiy kon-metallurgiya kombinatining Janubiy kon boshqarmasi bo‘linmalarida mehnat qilayotgan ishchi-xodimlar va ularning oila aʼzolari uchun ko‘p qavatli turar-joy foydalanishga topshirildi.

Yangi O‘zbekistonda inson qadrini ulug‘lash, odamlarni hayotidan rozi qilish muhtaram Prezidentimiz Shavkat Mirziyoyev rahnomaligida olib borilayotgan islohotlarning bosh maqsadidir.

Bu borada NKMK maʼmuriyati va Kasaba uyushmasi Kengashi tomonidan ham ishchi-xodimlarga munosib mehnat sharoitlarini yaratish, ularni har tomonlama qullab-quvvatlash borasida keng ko‘lamli ishlar amalga oshirilmoqda. Jumladan, mamlakatimiz mustaqillik yillarida Zarkent qo‘rg‘oni aholisi uchun yangi uy-joylar, yotoqxonalar, markazlashgan kanalizatsiya tizimi, sport va madaniyat majmuasi, akvapark kabi ijtimoiy soha obyektlari bunyod etildi.

Joriy yilda ham bunday xayrli ishlar davom ettirilib, ishchi-xodimlarning yashash sharoitini yaxshilash maqsadida 32 xonadonga mo‘ljallangan ko‘p qavatli uy-joy barpo etildi. Uning 24 tasi ikki xonali va 8 tasi uch xonali xonadondan iborat. Binoni qurish va jihozlashga kombinat tomonidan qariyb 17 mlrd. so‘m mablag‘ sarflandi. Har bir xonadonga elektr plitasi, suv isitkich qurilmasi o‘rnatilib, hududda bolalar maydonchasi, o‘rindiqlar va boshqa sharoitlar yaratib berildi.

Ushbu ko‘p qavatli uy-joyni foydalanishga topshirishga bag‘ishlangan tadbirda Qo‘shrabot tumani hokimi D.Shakarboyev, “NKMK” AJ Maʼmuriy masalalar bo‘yicha direktor N.Jo‘libekov, Kasaba uyushmasi Kengashi raisi I.Rahmatov, Janubiy kon boshqarmasi ishchi-xodimlari va ularning oila aʼzolari, mehnat faxriylari ishtirok etishdi. Tadbirda korxonaning 32 nafar ishchi-xodimiga yangi xonadonlarning kalitlari tantanali topshirildi.

- Inson qaysi sohada mehnat qilmasin, uy-joyli kishining har bir kuni unumli kechadi. Yigirma besh yildan buyon Janubiy kon boshqarmasida ishlayman. Yurtimiz mustaqilligining 34 yilligi oilamizga quvonch olib kirdi. Yangi xonadonli bo‘ldik. Bunday g‘amxo‘rlik kombinat maʼmuriyati, Kasaba uyushmasi Kengashining insonlarga bo‘lgan eʼtiboridan dalolatdir. Bu eʼtibor hamkasblarimga o‘rnak bo‘lib ishlashga chorlaydi, - deydi JKB texnik nazorat gurihi rahbari Ramazon Boltayev.

Tadbirda turar-joyni qurishda faol ishtirok etgan Zarafshon qurilish boshqarmasining bir guruh quruvchilari esdalik sovg‘alar bilan taqdirlandi.

“NKMK” AJ Matbuot xizmati