Bugungi kunda Navoiy kon-metallurgiya kombinatida bosqichma-bosqich amalga oshirilayotgan muhim investitsion loyihalardan biri 2 va 7-gidrometallurgiya zavodlarining chiqindilarini birgalikda saqlash uchun 2-GMZ chiqindi saqlash omborini kengaytirish va rekonstruksiya qilishga qaratilgan.

Mazkur loyiha doirasida 2032-yilgacha ushbu zavodlar faoliyati natijasida hosil bo‘ladigan chiqindilarni birgalikda saqlash uchun yangi maydonlar barpo etilmoqda. Loyiha bo‘yicha qurilish-montaj ishlari Zarafshon qurilish boshqarmasi tomonidan olib borilmoqda.

- Hozirgi vaqtda ushbu investitsion loyiha doirasida 2-gidrometallurgiya zavodining birinchi va ikkinchi chiqindi saqlash omborlarida to‘g‘onlarni turli balandliklarga ko‘tarish ishlari bajarilmoqda. Bugungi kunga qadar uzunligi 12 kilometrdan ortiq quvurlar tortilib, 75 ta kompensator, turli o‘lchamdagi 60 dan ortiq zulfin montaj qilindi. Kerakli asbob-uskunalar kombinatning Navoiy mashinasozlik zavodi, Markaziy kon boshqarmasining Zarafshon taʼmirlash-mexanika zavodi hamda “Toshkent quvur zavodi” MChJ tomonidan tayyorlanib yetkazilmoqda, - deydi Markaziy kon boshqarmasi qurilish bo‘limi boshlig‘i Xurshid Oydinov.

Ushbu investitsion loyihaning amalga oshirilishi kombinat korxonalarining texnogen chiqindilarini xavfsiz saqlanishini taʼminlaydi.

“NKMK” AJ Matbuot xizmati