Navoiy kon-metallurgiya kombinatining Investitsiya dasturi doirasida loyihalarning amalga oshirilishi, yangi korxonalar barpo etilishi hamda qo‘shimcha quvvatlar ishga tushirilishi natijasida Zarafshon taʼmirlash-mexanika zavodi mahsulotlariga bo‘lgan talab yildan-yilga ortib bormoqda.

Bugungi kunda 650 nafardan ortiq ishchi-xodim mehnat qilayotgan mazkur zavod nafaqat Markaziy kon boshqarmasi, balki kombinat bo‘linmalari uchun ham zarur jihozlar va moslamalarni o‘z vaqtida, sifatli taʼmirlash va tayyorlab berishga xizmat qilmoqda. 2025-yildan boshlab korxonada 9 ming turdagi mahalliylashtirilgan, import o‘rnini bosuvchi mahsulotlar ishlab chiqarilmoqda.

- So‘nggi yillarda zavodda gidravlik ekskavatorlar, burg‘ulash uskunalari, texnologik uskunalarning ehtiyot qismlari hamda konveyerlar uchun roliklar ishlab chiqarilishi yo‘lga qo‘yildi. Shuningdek, gidrometallurgiya zavodlarida foydalanilayotgan ko‘plab nasoslar, texnologik uskunalar, ekskavatorlarning kovshlari va elektr dvigatellari taʼmirlanmoqda. 2025-yilda korxona tomonidan 270 mlrd. so‘mlik mahsulot ishlab chiqarilgan bo‘lsa, joriy yilda bu ko‘rsatkichni 300 mlrd. so‘mga yetkazish rejalashtirilgan, - deydi Zarafshon taʼmirlash-mexanika zavodi bosh muhandisi Jamoliddin Salimov.

Korxona ishchi-xodimlari zimmasidagi vazifa va rejalarni o‘z vaqtida bajarib, ishlab chiqarish jarayonlariga o‘zlarining munosib hissalarini qo‘shib kelishmoqda.

“NKMK” AJ Matbuot xizmati