Yurtimizda korrupsiyaga qarshi kurashish maqsadida, qator qonunchilik hujjatlari qabul qilinib, bu borada, avvalo, aholining huquqiy ongi va madaniyatni yuksaltirish, jamiyatda korrupsiyaga nisbatan murosasiz munosabatni shakllantirish yuzasidan keng ko‘lamli ishlar olib borilmoqda. Prezidentimiz raisligida yaqinda o‘tgan yig‘ilishda ham bu masala muhim vazifalar belgilab berildi.

Navoiy kon-metallurgiya kombinatida ham 2025 yilga mo‘ljallangan chora-tadbirlar dasturi doirasida Komplayens xizmati tomonidan muntazam targ‘ibot ishlari o‘tkazib kelinmoqda.

Komplayens xizmati tarkibidagi sho‘ba boshlig‘i Azamat Bozorov shunday deydi:

“Har qanday illatga qarshi kurashishning eng samarali usuli, bu - kuchli targ‘ibot, odamlarning huquqiy ongini yuksaltirish hisoblanadi. Korrupsiya ham ana shunday xavflardan biridir. Yurtimizda unga qarshi kurashish bo‘yicha keng qamrovli ishlar olib borilmoqda. Qonunchiligimizda esa jinoyatchiga jazo muqararligi qat’iy belgilab qo‘yilgan. Afsuski shunga qaramasdan, hayotimizda bu kabi jinoyatga qo‘l urayotganlar hamon uchrab turibdi. Buni ijtimoiy tarmoqlar orqali kuzatib kelayapmiz.

Yaxshi bilamiz, Navoiy kon-metallurgiya kombinati dunyoga mashhur, nufuzli korxona. Unda ishlash hammamiz uchun – sharaf va yuksak mas’uliyat. Moddiy ta’minoti, ijtimoiy himoyasi havas qilishga arzigulik bunday korxonada ishlab, bilib-bilmay korrupsion holatlarni sodir etish, jinoyatga qo‘l urish kechirilmas va eng ayanchli holatdir. Biz, ko‘p ming kishilik jamoa o‘rtasida huquqni muhofaza qiluvchi organlar bilan hamkorlikda olib borayotgan huquqiy targ‘ibotlarimizda hamkasblarimiz ongiga uni hayotiy misollar, roliklar va tarqatma materiallar orqali chuqur singdirishga harakat qilayapmiz. Bu ishlarga Komplayens xizmatining yuqori tajriba va malakaga ega xodimlari to‘liq safarbar etilib, bo‘linmalarda, ish joylarida, jamoatchilik ishtirokidagi tadbirlarda tushuntirish ishlarini amalga oshirmoqda.

Joriy yilning o‘tgan yarim yilligida kombinat ishchi-xodimlari o‘rtasida 62 marotaba ana shunday huquqiy targ‘ibot va profilaktik tadbirlar, 3 marotaba OAV vakillari uchun brifing, 61 marotaba seminar, uchrashuv va davra suhbatlari tashkil etildi.”

Shu bilan birga, Komplayens xizmati xodimlari tomonidan kombinatda raqobat, manfaatlar to‘qnashuvi to‘g‘risidagi qonunchilik hujjatlari talablari bajarilishi qat’iy nazoratga olingan. Korrupsiyaviy xavf-xatarlarni aniqlash va baholash, ichki idoraviy hujjatlarni korrupsiyaga qarshi huquqiy ekspertizadan o‘tkazish, xizmat tekshiruvlari qonunbuzilish holatlarini barvaqt aniqlash va bartaraf etish imkonini bermoqda. Ayniqsa, nomzodlarni ishga qabul qilishda hujjatlarga rioya etilishi va ochiq tanlov asosida olib borilishi turli norozichiliklarning oldini olishga xizmat qilmoqda. Bu ishlarning barchasi ochiq va shaffof ekani odamlarning jamiyatga bo‘lgan ishonchini oshirmoqda.

“Navoiy KMK” AJ Matbuot xizmati.