• Создано: 31.08.2023
• Обновлено: 31.08.2023
• Прочитано: 1756

Поздравление в честь 32-летия государственной независимости

Qadrli do‘stlar!

Siz, aziz hamkasblar va mehnat faxriylari, sizlarning timsolingizda yurtdoshlarimizni O‘zbekiston Respublikasi davlat mustaqilligining o‘ttiz ikki yillik bayrami bilan chin qalbdan samimiy tabriklayman.

Yurtimiz bo‘ylab eng ulug‘, eng aziz bayram shukuhi kezmoqda. Istiqlol nashidasi dillarga cheksiz quvonch ulashmoqda. Xalqimiz tarixiy sanani “Yangi hayot uchun, Yangi O‘zbekiston uchun!” g‘oyasi ostida ko‘tarinki ruh va kayfiyatda kutib olmoqda. Navoiy kon-metallurgiya kombinati bo‘linmalarida ham qutlug‘ bayram ruhiga hamohang tadbirlar bo‘lib o‘tmoqda. Hamkasblarimiz ayyom mavzusiga mos ma’naviy-ma’rifiy tadbirlar, mustaqillik va yangi O‘zbekistonda bo‘layotgan o‘zgarishlarni ulug‘lovchi ma’ruzalar, ijod namunalari orqali yana bir karra Istiqlol qadr-qimmati qanchalik aziz, ahamiyatli ekanini anglab yetishmoqda.

O‘zbekiston Respublikasi Prezidentining 2023-yil 27-iyuldagi “O‘zbekiston Respublikasi davlat mustaqilligining o‘ttiz ikki yillik bayramiga tayyorgarlik ko‘rish va uni o‘tkazish to‘g‘risida”gi qarorida ta’kidlanganidek, o‘tgan tarixan qisqa vaqt davomida elimizning fidokorona mehnati va qat’iyati bilan milliy o‘zligimiz, qadimiy tariximiz, boy madaniyatimiz, ezgu qadriyat va an’nalarimiz qayta tiklandi, davlat va jamiyat hayotining tub asoslari o‘zgarib, mamlakatimiz dunyo hamjamiyatida o‘zining munosib o‘rniga ega bo‘ldi.

Darhaqiqat, mustaqillik beqiyos kuch-qudrat manbai, bebaho ne’matdir. Bu, taraqqiyot va farovonligimiz asosi bo‘lib, xalqimizni dorilomon kunlarga yetkazdi. Xalqimiz o‘zining mustahkam irodasi va matonatini namoyon etib, tarixan qisqa fursat ichida ulkan yuksalish yo‘lini bosib o‘tdi. Mustaqillik yillari, ayniqsa, keyingi yetti yilda amalga oshirilgan ishlarga o‘zingiz guvohsiz. Vatanimiz taraqqiyotining yangi bosqichida Yurtboshimiz rahbarligida olib borilgan keng qamrovli islohotlar Yangi O‘zbekiston davrini boshlab berdi. Iqtisodiyot tarmoqlari, sohalar rivoji uchun beqiyos imkoniyatlarni yaratdi. Buning natijasida mamlakatimizning xalqaro maydondagi nufuzi va obro‘-e’tibori tobora ortib bormoqda.

Qanchalik qiyin bo‘lmasin, bugun biz faqat oldinga qarab borayapmiz. Belni mahkam bog‘lab, sidqidildan mehnat qilib, barcha sohalarda yaxshi natijalarni qo‘lga kiritmoqdamiz. Albatta, bu oson emas. Qo‘lga kiritilayotgan muvaffaqiyatlarga faqat vatanparvarligimiz, fidoyiligimiz tufayli erishyapmiz. Chunki yurtga sidqidildan xizmat qilish fidoyilik belgisi, birinchi darajali vazifadir. Navoiy kon-metallurgiya kombinati jamoasining jonkuyar ishchi-xizmatchilari, muhandis-texnik xodimlarida ana shunday fazilatlar mujassam, desam ayni haqiqatni aytgan bo‘laman. Zero, keyingi yillarda amalga oshirilgan ishlar, qo‘lga kiritilgan yutuqlar shundan darak beradi. Buni keyingi yetti yil misolida olib qaraydigan bo‘lsak, shu davrda 20 ta yirik investitsion loyiha to‘liq yakunlangani, buning hisobiga kombinatda oltin ishlab chiqarish hajmi 2016-yilga nisbatan 21 foizga, kumush ishlab chiqarish 46 foizga oshgani quvonarli, faxrlanishga arzigulik natijadir.

Jamoamizda har bir oy, har bir yilni o‘ziga xos yutuqlar bilan yakunlash, tarixiy sanalar, qutlug‘ bayramlarni munosib mehnat sovg‘alari bilan kutib olish an’anaga aylangan. Bunga amal qilgan holda shu yilning o‘tgan yetti oyini ham yuqori iqtisodiy ko‘rsatkichlar bilan yakunlashga erishdik. Xususan, 37,3 trillion so‘mlik mahsulot ishlab chiqarilib, reja 110,5 foizga bajarildi. Shu davrda Investitsiya dasturi doirasida 261 million dollar mablag‘ o‘zlashtirildi va 389 milliard so‘mlik mahalliylashtirilgan mahsulotlar ishlab chiqarildi. Bu natijalar zamirida, albatta, har biringizning fidokorona mehnatingiz, munosib hissangiz mujassam. Buning uchun barchangizga o‘zimning samimiy tashakkurimni bildiraman. Mana shunday g‘ayrat-shijoat, ulkan natijalar bundan keyingi faoliyatingizda bardavom bo‘lishiga ishonaman.

Shuni mamnuniyat bilan ta’kidlash joizki, mustaqilligimizning o‘ttiz ikki yillik bayramiga munosib tuhfalar hozirlandi. Jumladan, qurilishi yaqinda tugallangan 6-gidrometallurgiya zavodi va Navoiy mashinasozlik zavodi mexanik yig‘uv sexining yirik gabaritli detallarga ishlov berish uchastkasi foydalanishga topshirildi. “To‘dako‘l” dam olish bazasi negizida Xalqaro shaxmat maktabi, Zarafshon shahrida 504 o‘rinli ixtisoslashtirilgan maktab-internati kabi obyektlar qurilib, ishga tushirishga tayyor holatga keltirildi.

Prezidentimizning “O‘zbekiston Respublikasi mustaqilligining o‘ttiz ikki yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhini mukofotlash to‘g‘risida”gi Farmoniga muvofiq bir guruh yurtdoshlarimiz yuksak davlat mukofotlari bilan taqdirlandilar. Jumladan, “Navoiy kon-metallurgiya kombinati” aksiyadorlik jamiyatining Markaziy kon boshqarmasi avtosamosval haydovchisi Sayfidin Baxronov “O‘zbekiston Respublikasida xizmat ko‘rsatgan sanoat xodimi” faxriy unvoni, “AuminzoAmantoy” koni boshlig‘i Avazxon Ezozxonov “Do‘stlik” ordeni, shuningdek, “Navoiyuran” DK “Uchquduq” geotexnologik koni burg‘ilash qurilmasi mashinisti Baxtiyor Utashev “Shuhrat” medali bilan taqdirlandilar. Mehnatlari yuksak darajada e’tirof etilgan hamkasblarimizni qo‘shaloq shodiyona bilan muborakbod etamiz.

Davlatimiz rahbari aytganidek: “Oradan hali qancha yillar, asrlar o‘tadi. Yurtimizda yangi-yangi avlodlar dunyoga keladi. Milliy davlatchiligimizni tiklab, bizga taraqqiyot va farovonlikka erishish yo‘lida mana shunday beqiyos imkoniyatlarni yaratib bergan istiqlolimiz jonajon Vatanimizning shonli tarixida hamisha eng yorqin, o‘chmas sahifa bo‘lib qoladi”.

Fursatdan foydalanib, barchangizni Mustaqillik bayramining o‘ttiz ikki yilligi bilan muborakbod etaman. Sizlarga mustahkam sog‘lik-salomatlik, oilaviy baxtu saodat, xonadonlaringizga fayzu baraka, ishlaringizda zafarlar tilayman.

Mustaqilligimiz abadiy bo‘lsin!

 

Quvondiq SANAQULOV,

“Navoiy kon-metallurgiya kombinati” AJ

Boshqaruv raisi – Bosh direktori.