2022-yil 19-noyabr kuni “Navoiy kon-metallurgiya kombinati” aksiyadorlik jamiyati O‘zbekiston Jurnalistlari ijodiy uyushmasi bilan hamkorlikdagi “Milliy jurnalistika: anʼanalar davomiyligi va zamonaviylik” mavzusidagi II mediaforumi boshlandi.

Ikkinchi marta tashkil etilgan mediaforumda mamlakatimizning hududlaridan tashrif buyurgan ommaviy axborot vositalari vakillari va jurnalistlar hamda O‘zbekiston Respublikasida akkreditatsiyadan o‘tgan xorijiy jurnalistlar ishtirok etmoqda.

Eslatib o‘tamiz, Milliy jurnalistika: anʼanalar davomiyligi va zamonaviylik” mavzusidagi I mediaforum joriy yilning 25-30-mart kunlari Navoiy shahrida o‘tkazilgan edi. Mediaforum ishtirokchilari uchun “NKMK” AJ bo‘linmalari – Navoiy mashinasozlik zavodi, 5-gidrometallurgiya zavodi, “Muruntov” koni va 7-gidrometallurgiya zavodiga press-turlar o‘tkazilgan bo‘lib, ular korxonalarda amalga oshirilayotgan ishlab chiqarish jarayonlari bilan yaqindan tanishgan edi.

Mediaforumining birinchi kunida ishtirokchilar uchun “NKMK” AJ Janubiy kon boshqarmasining Samarqand viloyat Qo‘shrabot tumani Zarkent qo‘rg‘onida joylashgan “Zarmitan” koniga press-tur tashkil etildi. Jurnalistlar kon faoliyati bilan yaqindan tanishdilar hamda ishchi-xodimlar bilan suhbatlashdilar.

Tadbirning ikkinchi kunida Jizzax viloyati Zomin tumanidagi “NKMK” sanatoriysida “Milliy jurnalistika: anʼanalar davomiyligi va zamonaviylik” mavzusidagi II mediaforumining tantanali ochilish marosimi o‘tkazildi. Unda O‘zbekiston Tashqi ishlar vazirligi, Turkiya Respublikasining O‘zbekistondagi elchixonasi, Tojikistoninng “Jumhuriyat” gazetasi, Buyuk Britaniyaning “Reyter”, Eronning “Fars news”, Ozarbayjonning “Azertaj”, Qirg‘izistonning “Kabar” axborot agentliklari, Turkiyaning “TRT” telekanali vakillari hamda respublikamizinng hududlaridan matbuot, televideniye, radio va internet sohasida faoliyat olib borayotgan jurnalistlar ishtirok etdi.

“Milliy jurnalistika: anʼanalar davomiyligi va zamonaviylik” mavzusidagi II mediaforum davom etmoqda.

“NKMK” AJ Matbuot xizmati.