Zarafshon qurilish boshqarmasi Navoiy kon-metallurgiya kombinatining yirik qurilish tashkiloti sifatida vaqt sinovida toblangan, o‘zida tajribali mutaxassis va quruvchilarni jam qilgan bo‘linmalaridan biridir. Sanoat korxonalarini modernizatsiya qilish, texnik va texnologik qayta jihozlashga yo‘naltirilgan investitsiyaviy dasturlarining barcha obyektlari bo‘yicha bosh pudratchisi hisoblangan qurilish boshqarmamiz keyingi yillarda modernizatsiyalash yo‘lidan bormoqda.

Hozirgi kunda “Amudaryo-Zarafshon” suv quvurining uchinchi liniyasini qurish va nasos stansiyalarini rekonstruksiya qilish, “Balpantov” va “Tomdibuloq” konlari negizida qazib olish karyerini qurish, “Turbay” konini o‘zlashtirish uchun qazib olish va qayta ishlash quvvatlarini kengaytirish, “Pistali” konida oltin tarkibli maʼdanlarni qayta ishlash majmuasi – 6-gidrometallurgiya zavodini qurish kabi loyihalar amalga oshirilmoqda.

Qo‘shrabot tumanidagi Zarkent qo‘rg‘onida 32 xonadonga mo‘ljallangan 4 qavatli turar joy binosi, Tomdi tumanida 504 o‘quv o‘rinli maxsus maktabinternat, Qiziltepa tumanidagi “To‘dako‘l” dam olish bazasi hududida 100 o‘rinli Xalqaro shaxmat maktabi kabi ijtimoiy obyektlarda qurilish ishlari qizg‘in davom etmoqda.

Jamoamiz oldida masʼuliyatli vazifalar turibdi. Ular orasida eng muhimi, Nurota tumanidagi “Pistali” konida oltin tarkibli maʼdanlarni qayta ishlash majmuasi, yaʼni 6-gidrometallurgiya zavodini to‘liq quvvat bilan ishga tushirishdir. Loyihaga ko‘ra, bu yerda 2024 yilgacha maʼdanni qayta ishlash zavodi, infrastruktura obyektlari, ichimlik suvi tarmoqlari va boshqa obyektlarni o‘z ichiga qamrab olgan qurilish va modernizatsiyalash ishlari olib boriladi.

Istiqbolli loyihalaridan biri hisoblangan “Turbay” konini o‘zlashtirish ishlari yakuniga yetkaziladi. Loyihada kondan yiliga ikki million tonna maʼdan qazib olish ko‘zda tutilgan. Tarkibida oltin bo‘lgan maʼdanlar 5-gidrometallurgiya zavodiga yetkazib beriladi. Maʼdanlarni tashish uchun uzunligi 45,3 kilometr bo‘lgan temiryo‘l qurilishi bitkazildi. Sanoat ishlab chiqarish maydonida ishchilarning yashash sharoitlarini yaxshilash maqsadida har biri 100 o‘ringa mo‘ljallangan 3 ta yotoqxona va 100 o‘ringa mo‘ljallangan oshxona barpo etilayapti.

Qurilish tashkilotimizda hozirda qariyb 2 800 nafar atrofida ishchi-xodimlar mehnat qiladi. Ularning 24 foizdan ortig‘ini yoshlar tashkil etadi. Zarafshon qurilish boshqarmasi “Zarmitan” qurilish-montaj boshqarmasi suvoqchilari Bobur Tangatarov, Abdumalik Karjaubayev, duradgor Fazliddin Oqmirzayev, Zarafshon” qurilish-montaj boshqarmasi qurilish-montaj ishlari ustasi Elyor Qodirov, betonchi Sirojbek Rahimovlar ishda tengdoshlariga o‘rnak bo‘layotgan yoshlardan.

Boshqarmamizning 4-avtokorxona haydovchilari obyektlarga zarur qurilish mahsulotlarni o‘z vaqtida yetkazib berayapti. Haydovchi Umirbek Shaketov, ortish mashinasi mashinisti Muhsin Jo‘raqulov, avtomobillarni taʼmirlovchi chilangar Jumagaliy Jalmenov va boshqa ko‘plab fidoyilarning mehnati tufayli rejalar vaqtida bajarilayapti.

Korxonamizda metall konstruksiyalar, temir-beton va yog‘ochga ishlov berish buyumlari va yarimtayyor profil mahsulotlar ishlab chiqariladi. So‘nggi yillarda alyuminiy, MDF eshiklari va profillari, bo‘yoq, pishgan g‘isht mahsulotlarini ishlab chiqarish yo‘lga qo‘yildi, turli rusumdagi 160 dan ortiq texnika-transport vositalari keltirildi.

Ali ESHONQULOV,

Zarafshon qurilish boshqarmasi boshlig‘i.

Manba: “Konchilar hayoti” gazetasining 2023-yil 16-iyundagi 11-soni

https://www.ngmk.uz/uz/home/blog/press-tsentr/gazeta–konchilar-hayoti-