Janubiy kon boshqarmasining 60 yilligiga

“NKMK” AJ Janubiy kon boshqarmasining Samarqand viloyatining Qo‘shrabot, Nurobod, Jizzax viloyatining G‘allaorol tumanida joylashgan “Zarmitan”, “G‘ujumsoy”, “Marjonbuloq” konlari, 4-gidrometallurgiya zavodi, “Marjonbuloq” oltin ajratish sexi va qolgan 17 ta bo‘linmasida ishlab chiqarish jadal sur’atda davom etmoqda.

Qariyb 6 ming nafarga yaqin jamoa mehnat qilmoqda. Soha fidoiylari mehnati bilan iqtisodiy natijalar, amalga oshirilayotgan muhim loyihalar yildan-yilga ortib borayotir.

Taqqoslash uchun aytish mumkinki, konlardan 2013-yilda 4,8 mln. kubometr tog‘ jinslari qazib olingan bo‘lsa, bu ko‘rsatkich 2023-yilda 7,6 mln. kubometrni tashkil etdi. Buning natijasida o‘tgan yili “Zarmitan” konidan 1,2 mln., “G‘ujumsoy” konidan 861 ming, “Marjonbuloq” konidan 483 ming tonna ma’dan qazib olindi.

Kon boshqarmasi jamoasi tomonidan belgilangan yillik rejalar muddatidan oldin ortig‘i bilan bajarilib, yuqori o‘sish sur’atiga erishildi. 2023-yilda 4-gidrometallurgiya zavodida 2,06 mln. tonna, “Marjonbuloq” oltin ajratish sexida 0,92 mln. tonna ma’dan qayta ishlandi. Bu yil qazib olish va qayta ishlash ko‘rsatkichlarini yanada oshirish mo‘ljallangan. Jumladan, mavjud konlardan 7,64 mln. kubometr tog‘ jinslari qazib olish, 4-GMZda 2,5 mln. tonna ma’danni qayta ishlash rejalashtirilgan.

Yaqinda “Zarmitan” koni ishchi-xodimlari manfaatini ko‘zlab 250 o‘rinli maishiy bino, 80 o‘rinli oshxona ham foydalanishga topshirilgani hamkasblarimizning ish sharoitlarini yanada yaxshiladi.

Shu kunlarda davom etayotgan, umumiy qiymati 235,6 mln. AQSh dollari bo‘lgan “Zarmitan” konining quyi gorizontlarini o‘zlashtirish – istiqbolli loyihalardan biridir. Bu loyiha, ya’ni, “Skipli” va “Bosh” shaxtalarida tik konlarni qurish ishlari Chexiya Respublikasining “Mine Construction Alliance s.r.o.” kompaniyasi tomonidan amalga oshirilmoqda. Bu kompaniya kon-shaxta ishlarini amalga oshirish bo‘yicha dunyodagi yetakchi kompaniyalardan. O‘zbekiston konchilik tarixida ilk marotaba amalga oshirilayotgan bu loyiha mamlakatimiz iqtisodiyoti va kombinat rivojida muhim strategik ahamiyatga ega.

Bugungi kunga qadar “Skipli” va “Bosh” shaxtalari chuqurligi 1 000 metrga yetkazilib, zaruriy uskunalar bilan jihozlandi. Bunday murakkab loyiha qurilishi va shaxtalarning chuqurligi ming metrga yetishi dunyo konchilik sohasida muhim yangilik bo‘lib, Markaziy Osiyoda yagona hisoblanadi. Bu esa o‘z navbatida “Zarmitan” sanoat maydonida ma’dan qazib olish hajmini yanada oshirishga qo‘shimcha imkoniyatlar yaratadi.

Mazkur loyiha doirasida “Skipli” shaxtaning yillik unumdorligi 1,4 mln. tonna oltin tarkibli ma’danni yer ostidan yer yuzasigacha olib chiqishga mo‘ljallangan va u qayta ishlash uchun 4-gidrometallurgiya zavodiga yetkazib beriladi. “Bosh” shaxta stvolining asosiy vazifasi ishchi-xodimlar va jihozlarni shaxtaga tushirib-chiqarish, shaxtadan yer osti suvlarini yer yuzasiga haydash, shaxtani toza havo oqimi bilan ta’minlash va shaxtadan tog‘ jinslarini chiqarish hisoblanadi. Hisob-kitoblarga ko‘ra, har ikkala shaxta joriy yilning oxiriga qadar to‘liq foydalanishga topshiriladi.

“NKMK” AJ Matbuot xizmati.